آل پاکستان ٹمبر ٹریڈرز ایسوسی ایشن اور کراچی ٹمبر مرچنٹس نے دو ماہ سے پورٹ پر پھنسے کنٹینرز کلیئر نہ ہونے پر کاروبار بند کرکے ہڑتال کردی۔
ایسوسی ایشن کے صدر شرجیل گوپلانی کے مطابق کراچی پورٹ پر محکمہ پلانٹ اینڈ پروٹیکشن کی وجہ سے گزشتہ دو ماہ سے لکڑی کے کنٹینرز کلیئر نہ ہونے کے خلاف کراچی ٹمبر مرچنٹس کے تاجر سراپا احتجاج ہیں۔
ان کا کہنا تھا کہ محکمہ پلانٹ اینڈ پروٹیکشن کی وجہ سے تاجروں کو بندرگاہ پر ڈیمرج اور ڈٹینشن کی مد میں لاکھوں روپے اضافی ادا کرنا پڑ رہے ہیں۔
انہوں نے کہا کہ جب تک پورٹ سے کنٹینرز کلیئر نہیں ہوں گے، تاجر برادری احتجاج کرے گی اور احتجاج کا دائرہ کار پورے پاکستان میں بڑھایا جائے گا۔
