بھارتی رئیلٹی شو بگ باس سے شہرت پانے والے پستہ قد گلوکار عبدو روزک نے منگنی کرلی جس کی تصاویر سوشل میڈیا پر وائرل ہوگئیں۔
گزشتہ روز عبدو روزک نے اپنے انسٹاگرام اکاؤنٹ پر ایک خوبصورت ہیرے کی انگوٹھی کی تصویر شیئر کی تھی جو انہوں نے اپنی ہونے والی اہلیہ کے لیے خریدی تھی۔
اب بیس سالہ عبدو روزک کی نئی تصاویر سوشل میڈیا پر صارفین کی توجہ کا مرکز بن رہی ہیں جس میں وہ عربی دولہا کے لباس میں بیٹھے اپنی ہونے والی اہلیہ کو وہی انگوٹھی پہنا رہے ہیں۔ منگنی کی خوبصورت تصویری جھلیکیاں صارفین کو بے حد پسند آرہی ہیں۔
واضح رہے کہ تاجکستانی گلوکار عبدو روزک نے گذشتہ روز انسٹاگرام پر ایک نوٹ شیئر کرتے ہوئے لکھا تھا ’میں نے اپنی زندگی میں کبھی سوچا بھی نہیں تھا کہ میں اتنا خوش قسمت ہوں گا کہ مجھے ایک ایسا پیار ملے گا جو میری عزت کرے اور میری زندگی میں آنے والی رکاوٹوں کا بوجھ نہ ہو، 7 جولائی کی تاریخ محفوظ کرلیں، میں لفظوں میں بیان نہیں کر سکتا کہ میں کتنا خوش ہوں‘۔
خیال رہے بیس سالہ عبدو روزک مبینہ طور پر شارجہ کی ایک 19 سالہ اماراتی لڑکی سے 7 جولائی کو شادی کے بندھن میں بندھے گے۔
