صحت کے کارکنوں نے بچوں اور عام لوگوں کے حقوق اور صحت کے تحفظ کے لیے پاکستان میں تمباکو پر ٹیکس میں فوری اضافے کا مطالبہ کیا ہے۔

سوسائٹی فار دی پروٹیکشن آف دی رائٹس آف دی چائلڈ (سپارک) کی جانب سے جاری کردہ ایک پریس ریلیز میں کہا گیا ہے کہ یہ مطالبہ ایک ایسے وقت میں کیا گیا ہے جب قوم کو صحت عامہ کے شدید بحران کا سامنا ہے۔

کمپین فار ٹوبیکو فری کڈز کے کنٹری ہیڈ ملک عمران احمد نے کہا ہے کہ حالیہ اعدادوشمار پاکستان میں تمباکو کے استعمال کے حوالے سے خطرناک ہیں۔ تقریباً 31.6 ملین بالغ (جو کہ بالغ آبادی کا تقریباً 19.9 فیصد ہے) فی الحال تمباکو کا استعمال کرتے ہیں، تمباکو سے متعلقہ بیماریاں سالانہ 160,000 سے زیادہ جانیں لیتی ہیں، جس سے صحت کی دیکھ بھال کے نظام پر ایک اہم بوجھ پڑتا ہے اور معیشت کو اس کی جی ڈی پی کا کم از کم 1.4 فیصد خرچ کرنا پڑتا ہے۔

ملک عمران احمد نے تفصیل سے بتایا کہ تمباکو پر حالیہ فیڈرل ایکسائز ڈیوٹی (ایف ای ڈی) میں اصلاحات نے ریونیو جنریشن کے حوالے سے امید افزا نتائج کا مظاہرہ کیا ہے۔

انہوں نے کہا کہ جولائی 2023 سے جنوری 2024 تک کی وصولیاں پہلے ہی 122 بلین سے تجاوز کر چکی ہیں، پورے سال کے تخمینوں کے ساتھ 200 بلین سے زیادہ ہے، جو پچھلے مالی سالوں کے مقابلے میں کافی اضافہ ہے۔ مزید برآں، ان اصلاحات سے مالی سال 2023-24 کے لیے سگریٹ سے جنرل سیلز ٹیکس (جی ایس ٹی) کی مد میں 60 ارب روپے اضافی حاصل ہونے کی توقع ہے۔

ان کا کہنا تھا کہ ایف ای ڈی اور جی ایس ٹی کے مشترکہ اثرات کا تخمینہ لگ بھگ 88 بلین ہے، جو پچھلے سال کے مقابلے میں تقریباً 49 فیصد کی غیر معمولی متلعقہ نمو کو ظاہر کرتا ہے۔

عمران احمد نے مزید کہا کہ مالی فوائد کے علاوہ، یہ اصلاحات تمباکو کے استعمال کو کم کرکے اور پاکستان میں تمباکو نوشی سے منسلک صحت کی دیکھ بھال کے کل اخراجات کے 17.8 فیصد کی ممکنہ وصولی کے ذریعے صحت عامہ کو فروغ دینے میں اہم کردار ادا کرتی ہیں۔ تاہم، موجودہ شرح کو برقرار رکھنے کے نتیجے میں مزید کارروائی کی فوری ضرورت کو اجاگر کرتے ہوئے، صحت کی لاگت کی وصولی میں کمی واقع ہو سکتی ہے۔

ان کا کہنا تھا کہ 2023-24 میں صحت کی لاگت کی وصولی کی اسی سطح کو حاصل کرنے کے لیے، آئندہ سال کے لیے ایف ای ڈی کی شرح میں 37 فیصد اضافے کی سفارش کی گئی ہے۔ ٹیکس کی یہ تجویز ایک واضح ’جیت‘ کا منظر پیش کرتی ہے، جس سے محصولات میں اضافہ اور صحت عامہ کی حفاظت کے ذریعے حکومت اور پاکستان کے عوام دونوں کو فائدہ ہو گا۔

سپارک کے پروگرام مینیجر ڈاکٹر خلیل احمد ڈوگر نے کہا تمباکو کے استعمال کے تباہ کن اثرات انفرادی صحت سے کہیں زیادہ پھیلے ہوئے ہیں، جس سے خاندانوں، برادریوں اور بڑے پیمانے پر معیشت متاثر ہوتی ہے۔ ہم نفاذ کی عجلت کو نظر انداز کرنے کے متحمل نہیں ہو سکتے۔ اس بحران سے نمٹنے کے لیے موثر اقدامات کی ضرورت ہے۔

ڈاکٹر خلیل نے کہا کہ غلط فہمیوں کے برعکس، تحقیقی شواہد اس دلیل کی سختی سے تردید کرتے ہیں کہ ٹیکس میں اضافہ غیر قانونی تجارت کو فروغ دے سکتا ہے، جو کہ تمباکو فرموں کی جانب سے ٹیکس پالیسیوں پر اثر انداز ہونے اور ٹیکس سے بچنے کے لیے استعمال کیے جانے والے ہیرا پھیری کے ہتھکنڈوں کو نمایاں کرتا ہے۔

مزید برآں، انہوں نے کہا کہ حال ہی میں شروع کیے گئے ٹریک اینڈ ٹریس سسٹم کے نفاذ سے جعل سازی پر مزید قابو پانے، غیر قانونی تجارت کو روکنے اور تمباکو کی صنعت کے موثر ضابطے کو یقینی بنانے کی ضرورت ہے۔

صورت حال کی نزاکت کو تسلیم کرتے ہوئے، ڈاکٹر خلیل نے اس بات پر زور دیا کہ یہ ضروری ہے کہ ہم پاکستان میں تمباکو کے استعمال کو روکنے کے لیے فیصلہ کن اقدام کریں تاکہ اپنے شہریوں، خاص طور پر اپنے بچوں کی صحت اور فلاح و بہبود کی حفاظت کی جا سکے۔