کراچی کی عدالت نے ایک ماہ کے دوران بیوی پر تیزاب پھینکنے کے مختلف مقدمات میں ملزمان میں 14-14 سال قید بامشقت کی سزا سنائی ہے۔

ڈان نیوز کی رپورٹ کے مطابق عدالت کے ایڈیشنل ڈسٹرکٹ اینڈ سیشن جج (ایسٹ) محمد الیاس میمن نے کوثر عباس کو اپنی بیوی صائمہ پر تیزاب پھینکنے کے جرم میں مجرم قرار دیا۔

عدالت نے 10 لاکھ روپے جرمانہ بھی عائد کرتے ہوئے ہدایت کی کہ یہ رقم شکایت کنندہ کو معاوضے کی مد میں دی جائے بصورت دیگر مجرم کو مزید 6 ماہ قید بھگتنا ہوگی۔

سرکاری وکیل کبریٰ سید کے مطابق شکایت کنندہ صائمہ نے ہسپتال میں ریکارڈ کرائے گئے اپنے بیان میں بتایا کہ اس کا شوہر نشہ کا عادی تھا اور اکثر اس سے منشیات خریدنے کے لیے پیسے مانگتا تھا۔

اس کے رویے کی وجہ سے وہ ان کا گھر چھوڑ کر اپنے بھائی کے پاس رہنے لگی۔ 19 مارچ 2021 کو اس کا شوہر گھر آیا اور منشیات خریدنے کے لیے مزید رقم کا مطالبہ کیا۔ تاہم جب شکایت کنندہ نے انکار کیا تو اس نے اسے دھمکی دی اور اس پر تیزاب کی بوتل پھینک دی جس سے وہ جھلس کر زخمی ہوگئی۔

اس سے قبل 4 اپریل کو کراچی کی اسی سیشن عدالت نے بیوی پر تیزاب پھینکنے والے شخص کو 14 سال قید بامشقت کی سزا سنائی تھی۔

جج محمد الیاس میمن نے کوثر عباس کو اپنی بیوی صائمہ پر تیزاب پھینکنے کے جرم میں مجرم قرار دیا تھا جس کا جسم 31 فیصد جھلس گیا تھا۔