لاہور پولیس ملازمین پر حملوں میں ملوث مرکزی ملزم فیضان کو گرفتار کرلیا گیا۔ انکشاف ہوا ہے کہ ملزم کو افغانستان سے آپریٹ کیا جارہا تھا۔
پولیس ذرائع کے مطابق مرکزی ملزم فیضان کو بھٹہ چوک کےقریب الفلاح ٹاون سے گرفتار کیا گیا۔ ملزم بادامی باغ کا رہائشی ہے جب کہ سی ٹی ڈی اور ایک دیگر مقدمہ میں جیل بھی جاچکا ہے۔
ذرائع نے دعویٰ کیا ہے کہ ملزم کا تعلق کالعدم تنظیم سے ہے اور اسے افغانستان سے آپریٹ کیا جارہا تھا، مبینہ ٹارگٹ کلر دو مرتبہ افغانستان بھی جا چکا ہے۔
ابتدائی تفتیش میں یہ بات بھی سامنے آئی ہے کہ ملزم موٹر سائیکل پر ہدف تلاش کرتا تھا اور اس کا ہدف بغیر اسلحہ با وردی پولیس اہلکار ہوتا تھا، ملزم نے کئی کلومیٹر تک اپنے ہدف کا تعاقب کیا تھا۔
ذرائع نے بتایا کہ ملزم نے برآمد ہونے والے سامان کا الزام اپنے بھائی پر ڈالنے کی کوشش بھی کی۔
