چیئرمین سنی اتحاد کونسل صاحبزادہ حامد رضا کا کہنا تھا کہ پی ٹی آئی کا ہم سے اتحاد عمران خان کی رضا مندی سے ہوا، بلے باز والا موصوف پریشر برداشت نہیں کرسکا. انہوں نے کہا کہ میرے ٹویٹ کے مخاطب شیر افضل نہیں تھے نا کوئی اور تھا۔
حامد رضا نے کہا کہ ہم سب کلیئر تھے کہ الیکشن کمیشن ہمیں مخصوص نشستیں نہیں دے گا، آر اوز نے میری پارٹی کے 12 ایم پی ایز کے ٹکٹ مسترد کیے، سنی اتحاد کونسل جوائن کرنے کے بعد آج تک کوئی فلور کراسنگ نہیں ہوئی۔
شیر افضل مروت کے حوالے سے صاحبزادہ حامد رضا نے کہا کہ شیر افضل مروت نے اپنے بیان کی تردید بھی کردی، شیر افضل نے کہا کہ ان کے بیان کو توڑمروڑ کر پیش کیا گیا۔ ہم سنی اتحاد کونسل کے احسان مند ہیں۔
واضح رہے کہ پی ٹی آئی رہنما شیرافضل مروت نے ایک روز قبل نجی ٹی وی سے گفتگو میں سنی اتحاد کونسل کے ساتھ اتحاد بارے بیان دیتے ہوئے اسے غلطی قرار دیا تھا۔
انہوں نے کہا تھا کہ عمران خان نے ہمیں شیرانی گروپ کے ساتھ اتحاد کی ہدایت کی تھی جس پر کام بھی جاری تھا مگر پھر اچانک حامد رضا کی جماعت کے ساتھ بات چیت ہونے لگی جبکہ جمعیت علما اسلام شیرانی ہمارے ساتھ غیر مشروط اتحاد کے لیے تیار تھی۔
شیر افضل مروت کا مزید کہنا تھا کہ اگر شیرانی گروپ کے ساتھ عمران خان کی ہدایت کے مطابق اتحاد ہوجاتا تو ہمارا انتخابی نشان اور مخصوص نشستیں ہاتھ سے نہیں جاتیں۔
