بلوچستان کے مختلف اضلاع میں حالیہ بارشوں کے دوران جاں بحق افراد کی تعداد 9 ہوگئی جبکہ 259 مکانات مکمل تباہ ہوچکے ہیں، ماہی گیروں کی 80 کشتیاں بھی تباہ ہوئیں۔ متاثرہ اضلاع میں امدادی سرگرمیاں جاری ہیں۔ پی ڈی ایم اے کے مطابق آئندہ چوبیس گھنٹوں کے دوران مختلف علاقوں میں گرج چمک کے ساتھ مزید بارشوں اور پہاڑی علاقوں میں برفباری کا امکان ہے۔
پی ڈی ایم اے نے بلو چستان کے مختلف اضلاع میں حالیہ بارشوں کے دوران ہو نے والے نقصانات اور واقعات سے متعلق رپورٹ جا ری کر دی۔
رپورٹ کے مطابق حالیہ بارشوں کے دوران گھروں کی چھتیں گر نے سمیت مختلف واقعات میں بچوں سمیت 9 افراد جاں بحق ہوئے۔ ان افراد کا تعلق کیچ، خاران، بارکھان، پشین اور چمن سے ہے۔
پی ڈی ایم اے رپورٹ میں کہا گیا کہ حالیہ بارشوں کے دوران صوبے کے مختلف اضلاع میں 259 مکانات مکمل تباہ ہوئے، ایک ہزار 40 مکانات کو جزوی نقصان پہنچا۔
بارشوں کے دوران 4 سڑکیں مکمل تباہ اور ایک پل سیلابی ریلے کی نظر ہوا۔
موسلادھار بارشوں کے دوران ماہی گیروں کی 80 کشتیاں بھی تباہ ہوئی ہیں۔
پی ڈی ایم اے کی رپورٹ کے مطابق آئندہ چوبیس گھنٹوں کے دوران کوئٹہ، چمن، زیارت، پشین، قلات، چاغی، سوراب، سبی ، نصیرآباد، مستونگ، نوشکی اور لورالائی سمیت دیگر علاقوں میں گرج چمک کے ساتھ مزید بارشوں اور پہاڑی علاقوں میں برفباری کا امکان ہے۔
رپورٹ کے مطابق گوادر سمیت دیگر علاقوں میں بارش سے متاثرہ علاقوں میں پی ڈی ایم اے ، پاک فوج، نیوی، اور ضلعی انتظامیہ سمیت دیگر اداروں کی امدادی کارروائیاں جاری ہیں۔
پی ڈی ایم اے کے مطابق بارشوں سے متاثرہ اضلاع میں خوراک، خیمے، ڈی واٹرپمپس، واٹر کولرز، گیس سلنڈرز سمیت دیگر امدادی سامان پہنچا دیا گیا ہے۔
