گھوٹکی میں قومی شاہراہ پر ڈاکوؤں کی جانب سے مال بردار گاڑیوں پر فائرنگ کی گئی، جس کے بعد پولیس موقع پر پہنچی اور مقابلہ شروع ہوگیا۔

ایس ایس پی انورکھتران نے فائرنگ کے واقعہ کی تصدیق کرتے ہوئے بتایا کہ واقعہ گھوٹکی کیڈٹ کالج کے قریب قومی شاہراہ پر پیش آیا۔

انھوں نے مزید بتایا کہ فائرنگ سے مال بردار گاڑیوں کے شیشے ٹوٹ گئے اور ٹائر پھٹ گئے۔

ایس ایس پی کے مطابق ڈاکوؤں کی فائرنگ سے ایک ٹرک ڈرائیور زخمی ہوگیا۔ واقعہ کے فوری بعد گھوٹکی پولیس موقع پر پہنچی اور ڈاکوؤں کے ساتھ بیس منٹ تک شدید فائرنگ کا تبادلہ ہوا۔

انورکھتران کا کہنا تھا کہ گھوٹکی پولیس کے ویگو ڈالے کو گولیاں لگیں، تاہم اہلکار محفوظ رہے۔

ایس ایس پی نے بتایا کہ گھوٹکی پولیس نے دریائے سندھ کے حفاظتی بند پر ناکہ بندی کرلی ہے۔