پاکستان تحریک انصاف کے رہنما اسد قیصر نے سابق چیئرمین پی ٹی آئی عمران خان کو رہا کرنے سے متعلق قرارداد جمع کرادی۔
سابق وزیراعظم عمران خان کی رہائی کی قرارداد قومی اسمبلی سیکریٹریٹ میں جمع کرائی گئی۔
قرارداد کے متن میں کہا گیا کہ عمران خان کے خلاف غیر قانونی اور جھوٹے مقدمات بنائے گئے ہیں، سابق چیئرمین پی ٹی آئی کو سیاسی انتقام کا نشانہ بنایا جارہا ہے۔
قرارداد میں کہا گیا کہ عمران خان پر قائم مقدمات کی کوئی قانونی حیثیت نہیں، سابق وزیراعظم کے خلاف قانون کا غلط استعمال بند کیا جائے، پی ٹی آئی کے گرفتار رہنماوں کو فوری رہا کیا جائے، بانی پی ٹی آئی کو عوام سے دور کرنے کے لیے مقدمات بنائے گئے ہیں۔
پاکستان تحریک انصاف نے گرفتار صحافیوں کی رہائی کا بھی مطالبہ کردیا۔
