اسلام آباد ہائیکورٹ نے ایم ڈبلیو ایم کی فارم 45 اور 47 ویب سائٹ پراپلوڈ نہ کرنے پر الیکشن کمیشن کے خلاف درخواست درخواست بدھ کو اعتراضات کے ساتھ سماعت کے لیے مقرر کرنے کی ہدایت کردی ہے، جبکہ دوسری جانب الیکشن کمیشن نے فارم 45 ویب سائٹ پر جاری کردیے ہیں۔
الیکشن کمیشن عام انتخابات کے 26 دن بعد بلآخر فارم 45 ویب سائٹ پر جاری کردیے ہیں، الیکشن ایکٹ کے تحت 14 روز میں فارم 45 ویب سائٹ پر ڈالنا لازمی ہیں۔
الیکشن کمیشن کی جانب سے فارم 45،46 ، 48 اور 49 جاری کئے گئے۔ الیکشن کمیشن نے صوبائی و قومی کے حلقوں کے فارمز حلقہ وائز فارمز جاری کئے۔
اسلام آباد ہائیکورٹ کے چیف جسٹس عامرفاروق نے فارم 45 اور 47 ویب سائٹ پراپلوڈ نہ کرنے پر الیکشن کمیشن کے خلاف درخواست پرسماعت کی۔
مجلس وحدت المسلمین کے وکلاء ایمان زینب مزاری اور عبدالہادی چھٹہ پیش ہوئے۔
ایم ڈبلیو ایم کے وکیل نے بتایا کہ قانون کے مطابق الیکشن کے بعد 14 دنوں کے اندرویب سائٹ پر فارمز اپلوڈ کرنا ہوتا ہے۔
چیف جسٹس نے کہاکہ پہلے اعتراض دور کرلیتے ہیں، پھر دیکھتے ہیں جبکہ عدالت نے کیس کی سماعت ایک روز کے لیے ملتوی کردی۔
مجلس وحدت المسلمین کے سربراہ علامہ راجہ ناصرعباس نے ہائیکورٹ میں گفتگوکرتے ہوئے کہاکہ 8 فروری کو عوام نے ووٹ ڈالا اور اس کو 9 فروری کو تبدیل کیا گیا پی ٹی آئی کو مخصوص نشستیں نہ دینا ذیادتی ہے۔
