پشتونخوا ملی عوامی پارٹی کی جانب سے الزام عائد کیا گیا ہے کہ پارٹی سربراہ اور صدارتی امیدوار محمود خان اچکزئی کے گھر پر پولیس کی بھاری نفری نے چھاپہ مارا ہے۔ پشتونخواہ ملی عوامی پارٹی نے واقعے کے خلاف احتجاج کیا۔
کوئٹہ میں اتوار کی شب مرکزی پارٹی سیکریٹریٹ میں ہنگامی پریس کانفرنس کرتے ہوئے مرکزی سیکریٹری جنرل عبدالرحیم زیارتوال نے کہا کہ پولیس کی بھاری نفری نے محمود خان اچکزئی کے گھر پر چھاپہ مارا۔ کسی مجسٹریٹ کے بغیر مارے گئے اس چھاپے میں چادر و چاردیواری کی پامالی کی گئی۔
واضح رہے کہ محمود خان اچکزئی کوسنی اتحاد کونسل کی جانب سے صدارتی امیدوار نامزد کیا گیا ہے۔
عبدالرحیم زیارتوال نے کہا کہ پولیس نے پارٹیسربراہ کے ایک ذاتی محافظ کو گرفتاربھی کیا جس کے پاس لائسنس یافتہ اسلحہ تھا۔
پشتونخوا ملی عوامی پارٹی کے رہنماؤں نے کہا کہ قومی اسمبلی اجلاس میں حالیہ انتخابات میں دھاندلی اور اسکے ذمہ دار افراد کیخلاف حقائق بیان کرنے پر محمود خان اچکزئی کے گھر پر چھاپہ مار کر انہیں انتقامی کارروائی کا نشانہ بنایا گیا۔
پشتونخوا ملی عوامی پارٹی کی جانب سے پارٹی سربراہ کے گھرچھاپے کیخلاف لورالائی میں احتجاجی ریلی نکالی گئی۔
مظاہرین کا کہنا تھا کہ محمود اچکزئی نے پارلیمنٹ میں آئین و قانون کی بالادستی کی بات کی، وہ صدارتی انتخابات میں امیدوار بھی ہیں، ان کے گھر پر چھاپہ چادر اور چار دیواری کی پامالی ہے۔ شرکا کی جانب سے واقعے کی مذمت کی گئی۔
رہنماؤں کا کہنا ہے کہ اس قسم کی کاروائیوں سے پارٹی اور قیادت کو مرعوب نہیں کیا جاسکتا ۔
دوسری جان سابق نگراں وزیراطلاعات بلوچستان جان اچکزئی نے محکمہ اطلاعات کے دفتر میں پریس کانفرنس سے خطاب کرتے ہوئے چھاپے کے الزام کو مسترد کردیا۔ انہوں نے کہا کہ یہ کارروائی محمود خان اچکزئی کے گھر کے سامنے ایک اراضی پر کیے جانے والے قبضے کے خاتمے کے لیے کی۔ اراضی کی رکھوالی محمود خان اچکزئی کا ذاتی محافظ کررہا تھا جسے پولیس کارروائی میں رکاوٹ ڈالنے پر گرفتار کیا گیا۔
جان اچکزئی کا مزید کہنا تھا کہ جہاں بھی سرکاری یا نجی اراضی پر قبضہ ہے، حکومت واگزار کرانے کیلئے مہم جاری رکھے گی۔
ڈپٹی کمشنر کوئٹہ کا کہنا ہے کہ محمود خان اچکزئی نے ڈھائی کنال سرکاری اراضیپر چاردیواری لگاکر قبضہ کر رکھا تھا۔ کارروائی اسسٹنٹ کمشنر سٹی کی سربراہی میں پولیس اور دیگر قانون نافذ کرنیوالے اداروں کی جانب سے محمود خان اچکزئی کے رہائش گاہ کے قریب خالی پلاٹ واگزارکروانے کے لیے کی گئی۔
ڈپٹی کمشنرسعد بن اسد کے مطابق لارسرکار میں مداخلت اوراسسٹنٹ کمشنرپر اسلحہ نکالنے پر ایک شخص گرفتار کیا گیا ہے جو غیر قانونی اسلحہ لیے چاردیواری کے تحفظ پر بیٹھا تھا۔
بلوچستان بار کونسل نے بصدارتی امیدوار محمود خان اچکزئی کے گھر پر چھاپے کے خلاف عدالتی بائیکاٹ کا اعلان کردیا۔
بار کونسل کی جانب سے کہا گیا ہے کہ کل بلوچستان بھر میں عدالتی کارروائی سے بائیکاٹ کی جائے گی۔ محمود خان اچکزئی نے پارلیمنٹ میں آئین و قانون کی بالادستی کی بات کی۔ صدارتی امیدوار ہونے کے باوجود ان کے گھر پر چھاپہ قابل مذمت ہے۔
