سابق بھارتی کھلاڑی اور بی جے پی کے رہنما گوتم گمبھیر نے اپنی جماعت سے الگ ہونے کا فیصلہ کر لیا ہے، گوتم اپنی ساری توجہ آئی پی ایل پر رکھنا چاہتے ہیں۔
معروف بھارتی سیاستدان اور سابق کھلاڑی گوتم گمبھیر نے اپنی پارٹی سے سیاسی ذمہ داریاں واپس لینے کی درخواست کر دی ہے۔
تاہم بھارتی میڈیا کی جانب سے دعویٰ کیا جا رہا ہے کہ گوتم گمبھیر کی جانب سے یہ فیصلہ انتخابات 2024 میں ٹکٹ نہ ملنے پر کیا گیا ہے۔
ایسٹ دہلی سے منتخب ہونے والے سیاستدان کا ایکس اکاؤنٹ پر کہنا تھا کہ میری پارٹی صدر جے پی نڈا جی سے درخواست ہے کہ وہ مجھے میری سیاسی ذمہ داریوں سے آزاد کر دیں، تاکہ میں اپنی دیگر کمٹمنٹس کو پورا کر سکوں۔ میں وزیر اعظم نریندر مودی کا شکر گزار ہوں، جنہوں نے مجھے یہ موقع دیا کہ میں عوام کی خدمت کر سکوں۔
جکہ بھارتی میڈیا کی جانب سے گوتم گمبھیر کے اس فیصلے پر حیرانی کا اظہار کیا جا رہا ہے، بھارتی میڈیا کا خیال تھا کہ بھارتی الیکشن میں بی جے پی کی 100 سے زائد امیدواروں کی فہرست میں گوتم گمبھیر کا نام ہوگا تاہم خود گوتم گمبھیر کے پوسٹ نے معاملے کو کلئیر کر دیا ہے۔
دوسری جانب گوتم گمبھیر گزشتہ انتخابات میں ایسٹ دہلی سے 6 لاکھ 95 ہزار 109 ووٹ لے کر کامیاب ہوئے تھے، وہ 2019 سے بھارتیہ جنتا پارٹی سے منسلک رہے ہیں۔
لیکن ساتھ ہی گوتم گمبھیر نے کرکٹ کو بھی نہیں چھوڑا ہے، وہ انڈین پریمئیر لیگ (آئی پی ایل) کی ٹیم کولکتہ نائٹ رائڈرز کی ٹیم کے مینٹور ہیں،جو کہ 2 مرتبہ ایونٹ کا ٹائٹل اپنے نام کر چکی ہے۔
واضح رہے گوتم گمبھیر پاکستان اور بھارت کے میچز کے دوران پاکستانی ٹیم پر بے جا تنقید کرتے دکھائی دیتے ہیں۔
