خیبرپختونخوا اسمبلی میں اسپیکر اور ڈپٹی اسپیکر انتخابات کے دوران تعداد سے دو اضافی ووٹ اپوزیشن کو پڑگئے۔
ذرائع کے مطابق دو اضافی ووٹ سنی اتحاد کونسل کی جانب سے اپوزیشن کو پڑے ہیں، جس کے بعد سنی اتحاد کونسل میں کھلبلی مچ گئی ہے۔
ذرائع کا کہنا ہے کہ نامزد وزیراعلیٰ خیبرپختونخوا علی امین گنڈاپور کو اس معاملے سے آگاہ کردیا گیا ہے، پارٹی ہدایات کی خلاف ورزی کرنے والوں کے خلاف کمیٹی بھی بنائی گئی ہے۔
کمیٹی انکوائری کرنے کے بعد نامزد وزیراعلیٰ کو رپورٹ کرے گی۔
واضح رہے کہ اسپیکر کے انتخاب میں بابر سلیم کو 89 ووٹ جبکہ احسان اللہ کو 17 ووٹ ڈالے گئے۔ ڈپٹی اسپیکر کے انتخاب میں ثریا بی بی کو 87 ووٹ جبکہ ارباب وسیم کو 19 ووٹ ڈالے گئے۔
