چنیوٹ تھانہ سٹی میں نئے تعینات ہونے والے ایس ایچ او سٹی اظہر عباس نے شہریوں کے رات بارہ بجے کے بعد گھروں سے نکلنے پر پابندی لگا دی۔ شہر میں پولیس کے اعلان کے بعد شہریوں میں تشویش کی لہر دوڑ گئی۔
ایس ایچ او سٹی کی جانب سے لاؤڈ اسپیکر پر شہر بھر میں اعلانات کا سلسلہ جاری ہے۔
اعلان میں کہا گیا کہ کوئی بھی شہری رات 12 بجے کے بعد سڑکوں پر نہیں نکلے گا۔ رات بارہ بجے کے بعد گھر سے نکلنے والے شہریوں کو حوالات میں بند کردیا جائے گا۔
ایس ایچ او سٹی نے سرکاری گاڑی پر بیٹھ کر اعلان کیا، جسے ویڈیو میں دیکھا اور سنا جاسکتا ہے۔
ایس ایچ او سٹی اظہر نے کہا کہ ’میں جو اعلان کرتا ہوں اس پر عمل درآمد بھی کراتا ہوں‘۔
لاؤڈ اسپیکر پر گھر سے باہر نکلنے کی پابندی کا اعلان سنتے ہی شہریوں میں خوف وہراس پھیل گیا۔
