روس میں صدر پوٹن کے سب سے بڑے مخالف الیگزی ناوالنی کی میت ان کی والدہ کے حوالے کردی گئی ہے۔
الیگزی ناوالنی کی والدہ نے دو دن قبل روسی حکومت سے مطالبہ کیا تھا کہ انہیں بیٹے کی میت دی جائے تاکہ جلد تدفین ممکن ہو۔
حکومت نے ان سے ضمانت چاہی تھی کہ تدفین کو سیاسی ایونٹ نہیں بننے دیا جائے گا۔
الیگزی کی والدہ لیوڈیملا ایوانوا فی الحال دور افتادہ شہر لیکھرڈ میں ہیں اور واضح نہیں تدفین فیملی کی مرضی کے مطابق ہوگی یا حکام مداخلت کریں گے۔
روسی اپوزیشن لیڈر کا انتقال ملک کے سرد ترین علاقے میں واقع قید خانے میں ہوا تھا۔ الیگزی ناوالنی کی بیوہ اور بیٹی نے دو دن قبل امریکی صدر جو بائیڈن سے ملاقات کی تھی۔
الیگزی کی فیملی نے اب تک تدفین کے پروگرام کا اعلان نہیں کیا ہے۔ ان کے اسٹاف نے تمام چاہنے والوں سے کہا ہے کہ وہ پُرامن رہیں اور کسی بھی طرح کی بدنظمی کا مظاہرہ نہ کریں۔
