پاکستان تحریک انصاف کے سابق چیرمین عمران خان اور ان کی اہلیہ بشریٰ بی بی پر 190 ملین پاؤنڈز ریفرنس میں فرد جرم ایک بارپھر مؤخر کردی گئی جبکہ احتساب عدالت نے نئی تاریخ 27 فروری مقرر کردی۔

اسلام آباد کی احتساب عدالت کے جج ناصر جاوید رانا نے 190 ملین پاؤنڈز ریفرنس کی اڈیالہ جیل میں سماعت کی۔ سابق چیئرمین پی ٹی آئی اور بشریٰ بی بی کو اڈیالہ جیل میں عدالت کے پروبروپیش کیا گیا۔

ملزمان کی جانب سے احتساب عدالت میں 3 درخواستیں دائر کی گئیں۔

سابق چیئرمین پی ٹی آئی کی جانب سے اہلیہ بشریٰ بی بی سے ملاقات کی درخواست دائر کی گئی جسے عدالت نے منظورکرلیا۔

وکلاء صفائی کی ریفرنس کی مکمل نقول فراہمی کی درخواست بھی منظورکر لی گئی۔

عمران خان کی بشریٰ بی بی سے ملاقات

دوسری جانب سابق وزیراعظم عمران خان کی اہلیہ بشریٰ بی بی سے ڈھائی ہفتے بعد عدالت میں ملاقات ہوگئی۔

راولپنڈی اڈیالہ جیل میں 190 ملین پاؤنڈ اسکینڈل ریفرنس کیس کی سماعت کے دوران بانی پی ٹی آئی نے روسٹرم پر آئے اور انہوں نے عدالت سے ڈینٹسٹ کو چیک اپ کروانے کی اجازت دینے کی درخواست کی۔

بانی پی ٹی آئی نے کہا کہ 7 مہینے ہوگئے، ایک باربھی ڈاکٹرکے پاس نہیں گیا، جس پر احتساب عدالت کے جج نے کہا کہ جیل میں ڈاکٹرز موجود ہیں، آپ چیک اپ کروالیں۔

عمران خان کا اس موقع پر کہنا تھا 70 سال کی عمر میں دانت کا چیک اپ کروانا ہے، جیل کا ڈاکٹر میرے دانت ہی نہ نکال دے، جس پر عدالت نے کہا کہ آپ درخواست دے دیں اس پر مناسب حکم سناتے ہیں۔

بعدازاں عدالت نے 190 ملین پاؤنڈ ریفرنس میں فردِ جرم کی کارروائی کے لیے 27 فروری کی تاریخ مقرر کر کے سماعت ملتوی کردی۔