پاکستان تحریک انصاف (پی ٹی آئی) کے رہنما اسد قیصر کی زیرِ صدارت پی ٹی آئی کے نو منتخب ارکان اسمبلی کا اجلاس منعقد کیا گیا۔
پارلیمنٹ لاجز میں ہونے والے پی ٹی آئی ارکان اسمبلی کے اجلاس میں دھاندلی کے خلاف تحریک اور سیاسی جماعتوں سے رابطوں سے متعلق تبادلہ خیال کیا گیا۔
ذرائع کے مطابق اجلاس میں اسد قیصر نے بانی پی ٹی آئی سے ملاقات پر نومنتخب ارکان کو اعتماد میں لیا۔
اجلاس میں بیرسٹر گوہر، لطیف کھوسہ اور علی محمد خان بھی شریک ہوئے اور مختلف جماعتوں کی جانب سے ملنے والے جوابات پر بھی بات چیت ہوئی۔
اجلاس میں خیبرپختونخواہ، پنجاب اور وفاق میں حکومت سازی کے حوالے سے بھی بات چیت ہوئی، ساتھ ہی مخصوص نشستوں کے حصول کے لیے لائحہ عمل پر غور کیا گیا۔
