خیبرپختونخوا کے ضلع ملاکنڈ کی تحصیل شانگلہ میں پی ٹی آئی کے مظاہرین اور پولیس کے درمیان فائرنگ کے تبادلے میں دو افراد جاں بحق جبکہ 6 افراد زخمی ہوئے ہیں۔

شانگلہ کے حلقہ این اے 11 میں پی ٹی آئی کے حمایت یافتہ آزاد امیدوار برائے قومی اسمبلی حاجی سید فرین خان نے الیکشن رزلٹ مسترد کیا تو حالات کشیدہ ہوگئے، پی ٹی آئی کے کارکنوں نے سرکاری گاڑی کو آگ لگادی۔

مظاہرین کا کہنا تھا کہ رزلٹ میں تاخیر کا مطلب دھاندلی اور دیگر وجوہات ہیں۔

مظاہرین نے بشام ٹو سوات مین شاہراہ ہر قسم ٹریفک کیلئے بند بلاک کردی اور کہا کہ الیکشن کے فیصلے اور اس حلقے کے الیکشن دھاندلی زدہ قرار دینے تک مظاہرہ جاری رہے گا۔

ذرائع کے مطابق پولیس اور سیکیورٹی فورسز کی بھاری نفری موقع پر پہنچی تو الپوری میں پی ٹی آئی مظاہرین اور پولیس کے درمیان فائرنگ کا تبادلہ ہوا، جس میں دو افراد جاں بحق جبکہ 6 زخمی ہوئے۔

اس سے قبل خبر آئی تھی کہ دو پولیس اہلکاروں سمیت 3 افراد جاں بحق اور 10 سے زائد زخمی ہیں۔

ذرائع کے مطابق زخمیوں کو سیدو ٹیچنگ ہاسپٹل شفٹ کر دیا گیا ہے جن کی حالت تشویشناک ہے۔

زخمیوں میں تحریکِ انصاف کے رہنما اور سابق امیدوار قومی اسمبلی نواز محمود خان بھی شامل ہیں۔

اس سلسلے میں آج نیوز نے پولیس کا مؤقف معلوم کرنے کیلئے ڈسٹرکٹ پولیس آفیسر شانگلہ سے رابطہ کیا لیکن انہوں نے مؤقف دینے سے انکار کردیا۔