امریکی سیاست دان ویلینٹینا گومز نے اپنے حلقے کے ووٹرز کو یقین دلایا ہے کہ اگر وہ منتخب ہوگئی تو ایسی تمام کتابیں جلا ڈالے گی جن کے ذریعے بچوں کو اخلاق سوز عادات اپنانے کی تربیت دی جاتی ہے۔

24 سالہ ویلینٹینا نے گزشتہ روز سرِعام ایک ایسی کتاب نذرِ آتش کی جس میں ہم جنس پرستوں اور ٹرانس جینڈرز کی طرف واضح جھکاؤ رکھتے ہوئے ان سے اظہارِ ہمدردی کیا گیا تھا۔

ویلینٹینا کا تعلق ری پبلکن پارٹی ہے جو امریکا میں دائیں بازو کی سیاست کی علم بردار سمجھی جاتی ہے۔

ٹرانس جینڈر اور ہم جنس پرستوں سے اظہارِ بیزاری کی علامت کے طور پر کتاب جلانے کی وڈیو وائرل ہونے پر امریکا میں خاصا شدید ردِعمل سامنے آیا ہے۔

ویلینٹینا گومز مسوری میں سیکریٹری آف اسٹیٹ کے منصب کے لیے الیکشن لڑ رہی ہے اور یہ وڈیو اس کی انتخابی مہم کا حصہ تھی۔

وڈیو میں ویلینٹینا نے کہا کہ منتخب ہونے پر میں ایسی تمام کتابیں جلا ڈالوں گی جن کا مقصد بچوں کے جنسی رجحانات میں کجی پیدا کرنا ہے۔ یہ وڈیو فیس بک، انسٹا گرام اور X پر شیئر کی گئی ہے۔