مس جاپان منتخب ہونے والی کیرولینا شینو ایک جریدے کے اس الزام کے بعد کہ ان کے ایک شادی شدہ شخص کے ساتھ تعلقات تھے، اپنے ٹائٹل سے دستبردار ہوگئی ہیں۔

مس جاپان مقابلے کی یوکرین میں پیدا ہونے والی فاتح ن اپنے مداحوں اور عوام سے معافی مانگتے ہوئے ایک بیان میں کہا کہ ’مجھے اس بڑے مسئلے پر افسوس ہے جو میرا پیدا کردہ ہے، میں نے ان لوگوں کو دھوکہ دیا جنہوں نے میری حمایت کی۔‘

مس جاپان ایسوسی ایشن کا کہنا ہے کہ کیرولینا کی جانب سے معافی مانگے جانے کے بعد منتظمین نے ان کا استعفیٰ قبول کر لیا تھا۔ مس جاپان کا ٹائٹل اب اگلے مقابلے تک خالی رہے گا۔

26 سالہ شینو نے گزشتہ ماہ 2024 مس جاپان کا ٹائٹل جیتا تھا لیکن ان کی جیت نے عوامی بحث کو جنم دیا۔

اگرچہ کچھ نے اس پیشرفت کا خیرمقدم کیا تھا لیکن بیشترنے روایتی جاپانی خوبصورتی کے نظریات کے پیش نظر کیرولینا کو قبول نہیں کیا۔

اس دوران ایک مقامی میگزین نے اُن کے مبینہ افیئر کا انکشاف کیا۔

ری شوکان بنشن کی رپورٹ کے مطابق کیرولینا شینو نے ایک شادی شدہ بااثر شخص اور ڈاکٹر کے ساتھ تعلقات قائم کیے ، تاہم مذکورہ شخص کی جانب سے کوئی عوامی تبصرہ نہیں کیا گیا۔

مقابلہ کے منتظمین نے گزشتہ ہفتے اپنے بیان میں فاتح کا دفاع کرتے ہوئے کہا تھا کہ کیرولینا اس حقیقت سے واقف نہیں تھیں کہ وہ شخص شادی شدہ تھا۔

تاہم تازہ ترین بیان میں منتظمین کی جانب سے کہا گیا ہے کہ کیرولینا مئ اس شخص کی شادی اور خاندان کے بارے میں جاننے کا اعتراف کیا ہے۔