خیبر پختونخوا کے ضلع خیبر میں پی کے 70 سے آزاد امیدوار نبیل آفریدی کی گاڑی پر فائرنگ کی گئی ہے۔
نبیل آفریدی کی گاڑی پر اس وقت فائرنگ کی گئی جب وہ علاقہ شاکس میں الیکشن مہم میں مصروف تھے۔
پولیس کے مطابق نبیل آفریدی کی گاڑی پر فائرنگ نامعلوم موٹر سائیکل سواروں کی جانب سے کی گئی۔
اس حوالے سے پولیس نے مزید بتایا کہ گاڑی کو کئی گولیاں لگیں تاہم فائرنگ سے کوئی جانی نقصان نہیں ہوا۔
پولیس کے مطابق فائرنگ کے بعد ملزمان فرار ہوگئے ، ملزمان کا تعاقب جاری ہے۔
واضح رہے کہ 31 جنوری کو باجوڑ سے قومی اسمبلی کے حلقے این اے 8 پرآزاد امیدوار ریحان زیب خان کو بھی نامعلوم ملزمان نے فائرنگ کرکے قتل کردیا تھا۔
ابتدائی طور پر مقتول کو پی ٹی آئی کا امیدوار قرار دیا جا رہا تھا تاہم بعد میں یہ بات سامنے آئی کے مرحوم ریحان زیب آزاد حیثیت سے الیکشن لڑ رہے تھے۔
31 جنوری کو ہی چمن کے علاقے میزئی اڈہ میں عوامی نیشنل پارٹی کے انتخابی دفتر پر فائرنگ سے اےاین پی رہنما ظہور احمد جاں بحق ہوگئے تھے۔
اس کے علاوہ گزشتہ جمعہ کو کراچی میں الیکشن کمیشن سندھ کے آفس کے قریب دھماکا ہوا تھا۔
جمعہ کو ہی بلوچستان میں بم دھماکوں سمیت دہشت گردی کے سات واقعات ہوئے تھے جن میں کم سے کم سات افراد زخمی ہوئے۔
