حکومت نے پیٹرولیم لیوی کی مد میں 6 ماہ کے دوران عوام سے 472 ارب روپے وصول کیے ہیں۔ گزشتہ برس اِسی مدت کے دوران وصول کی جانے والی لیوی سے یہ وصولی 166 فیصد زیادہ ہے۔
رواں مالی سال کی پہلی ششماہی کے دوران وصول کی جانے پیٹرولیم لیوی پورے مالی سال کے لیے بجٹ کی مجوزہ پیٹرولیم لیوی کا 54 فیصد ہے۔
رواں مالی سال کی پہلی سہہ ماہی کے دوران پیٹرولیم لیوی کی مد میںٰ 222 ارب روپے وصول کیے گئے تھے۔
حکومت نے رواں مالی سال کے لیے بجٹ میں پیٹرولیم لیوی کی مد میں 869 ارب روپے کی وصولی متعین کی تھی تاہم آئی ایم ایف کو بعد میں یقین دہانی کرائی گئی کہ پیٹرول اور ہائی اسپیڈ ڈیزل پر لیوی 50 روپے فی لیٹر سے بڑھاکر 60 روپے فی لیٹر کیے جانے کی صورت میں مجموعی وصولی 918 ارب روپے ہوجائے گی۔
جولائی تا دسمبر ملک بھر میں پیٹرولیم مصنوعات کی فروخت میں مجموعی طور پر 15 فیصد کمی واقع ہوئی۔ آئل کمپنیز ایڈوائزری کاؤنسل کے بیان کے مطابق رواں مالی سال کی پہلی ششماہی کے دوران ملک بھر میں پیٹرولیم مصنوعات کی فروخت 76 لاکھ 80 ہزار میٹرک ٹن رہی۔
