پاکستان تحریک انصاف کے سینئیر رہنما بیرسٹر گوہر علی خان کا کہنا ہے کہ جس کی توقع کی جارہی تھی وہی ہوا، یہ ایسا کیس ہے جس کا سر ہے نہ پاؤں۔
بانی پی ٹی آئی عمران خان اور بشریٰ بی بی کو عدت نکاح کیس میں سزاؤں پر ردعمل دیتے ہوئے بیرسٹر گوہر نے کہا کہ فیصلہ زبانی سنایا گیا، اس کی کاپی نہیں دی، یہ سب غیرقانونی ہے۔
بیرسٹر گوہر نے کہا کہ جج صاحب نے ابھی فیصلے پر دستخط نہیں کیے۔
انہوں نے کہا کہ تاریخ میں پہلی بار دو دن میں 14، 14 گھنٹے ٹرائل کرکے فیصلہ سنایا گیا، یہ فیصلہ سیاسی مقاصد اورکردار کشی کے لیے ہے، سب کچھ بانی پی ٹی آئی کی کردارکشی کے لیے ہے۔
ان کا کہنا تھا کہ سیاسی مقاصد کے لیے ذاتی زندگیوں کو جھانکا گیا، فیصلے کے خلاف ہائیکورٹ سے رجوع کریں گے، ہمیں الیکشن سے باہر رکھنے کی کوشش کی جارہی ہے، یہ کیس سیاسی بنیادوں پرشروع کیا گیا تھا۔
