سربراہ استحکام پاکستان پارٹی (آئی پی پی) جہانگیر ترین نے کہا ہے کہ مسلم ن لیگ اور آئی پی پی عوام کی قسمت بدل دینگے، مل کر لوگوں کی خدمت کرنی ہے۔
ملتان میں جلسے سے خطاب میں جہانگیر ترین نے کہا کہ مجھے بہت خوشی ہوتی ہے ملتان آکر، یہ حلقہ میرا آبائی گھر ہے،میں سیاست میں حادثاتی طور پر آیا۔
انھوں نے مزید بتایا کہ میرے بہنوئی احمد محمود نے مجھے رحیم یار خان سے الیکشن لڑنے کا کہا، مجھے ایوان میں جاکر پتا چلا کہ یہاں تو سیاست ہی مختلف ہے۔
ان کا کہنا تھا کہ میرے لوگوں نے میرے اوپر مہربانی کی اور میں لودھراں سے 40 ہزار ووٹوں سے جیتا۔
انھوں نے کہا کہ مجھ سے کہا گیا کہ آبائی گھر میں جاکر الیکشن لڑیں آپ وہاں سے جیتیں گے، جب سے میں نے کاغذات جمع کروائے ہیں آپ کی محبت دیکھ کر بہت خوش ہوں۔
سربراہ استحکام پاکستان پارٹی جہانگیر ترین نے کہا کہ آپ نے مجھے کامیاب کیا تو میں ملتان کو کبھی نہیں چھوڑوں گا۔
انھوں نے کہا کہ لودھراں میں بہت کام کیے ہیں پہلے جو 100 کام کیے تھے اب 500 کروں گا۔ اگر عوام مجھے الیکشن جیتوائیں گے تو اپنے حلقے میں کام شروع ہی 500 سے ہوگا۔
