دہلی پولیس نے دو مسلمانوں کے خلاف ایک مقامی عدالت کے باہر ایک ساتھ تین طلاقیں دینے کا مقدمہ درج کرلیا۔

پولیس نے بتایا کہ پہلے کیس میں ایک عورت نان نفقہ کیس کی سماعت کے لیے اپنی بہن کے ساتھ دہلی کی تیس ہزاری عدالت گئی تھی۔

سماعت کے بعد اس عورت کے شوہر نے اسے کمرہ عدالت کے باہر تین طلاقیں دینے کا اعلان کیا۔ عورت کی شکایت پر اس کے شوہر کے خلاف مقدمہ درج کرلیا گیا۔ مقدمہ درج کرانے والی عورت نے کیمسٹری میں پی ایچ ڈی کیا ہے۔

دوسرے کیس میں ایک 24 سالہ خاتون نے پولیس کو بتایا کہ اس کی شادی فروری 2021 میں ممبئی میں ہوئی تھی۔ سسرالیوں کی طرف سے ہراساں کیے جانے پر وہ والدین کے پاس دہلی واپس آگئی۔

بعد میں اس نے نان نفقے کے لیے درخواست دائر کی۔ جب وہ اپنے اہل خانہ کے ساتھ سماعت کے لیے عدالت گئی تو وہاں شوہر، محمد انصاری، نے کمرہ عدالت کے باہر اسے ایک ساتھ تین طلاقیں دے دیں۔

اس خاتون کی طرف سے ملنے والی درخواست کی بنیاد پر پولیس نے اس کے شوہر کے خلاف مقدمہ دائر کرلیا۔