سپریم کورٹ آف پاکستان میں مستعفی یا ریٹائرڈ ججز کے خلاف سپریم جوڈیشل کونسل کی کارروائی جاری رکھنے کے لیے وفاقی حکومت کی اپیل سماعت کے لیے مقرر کردی۔
جسٹس امین الدین خان کی سربراہی میں سپریم کورٹ کا 3 رکنی بینچ آئندہ ہفتے حکومتی اپیل پر سماعت کرے گا۔
دوسری جانب سابق ڈپٹی اسپیکر قومی اسمبلی قاسم سوری کی رولنگ غیر آئینی قرار دینے کے خلاف نظرثانی درخواست سماعت کے لیے مقرر کردی گئی۔
جسٹس منصور علی شاہ کی سربراہی میں 5 رکنی لارجر بینچ آئندہ ہفتہ نظر ثانی درخواستوں پر سماعت کرے گا۔
بینچ میں جسٹس منیب اختر، جسٹس امین الدین خان، جسٹس جمال مندوخیل اور جسٹس اطہر من اللہ بھی شامل ہیں۔
اسی طرح سپریم کورٹ میں فوجی عدالتوں کے خلاف فیصلے پر اپیلیں بھی سماعت کے لیے مقرر کردی گئیں، عدالت عظمیٰ کا لارجر بینچ آئندہ ہفتے سماعت کرے گا۔
