بانی پی ٹی آئی کی بہن علیمہ خان کا کہنا ہے کہ چیف جسٹس قاضی فائز عیسٰی زبردست طریقے سے پروسیڈنگ کنڈکٹ کرتے ہیں ان سے اپیل کریں گے کہ بانی پی ٹی آئی ابھی تک جیل میں کیوں ہیں۔
اڈیالہ جیل کے باہر میڈیا سے گفتگو میں علیمہ خان نے کہا کہ چیف جسٹس سے اپیل ہے جج دلاور نے بانی پی ٹی آئی کیخلاف ناجائز فیصلہ کیا، جج دلاور کی تحقیقات ہونی چاہئیں۔
عمران خان کی بہن نے الزام عائد کیا کہ جسٹس دلاور دوبارہ جج ہوں گے اور ناجائز فیصلے دیں گے۔
انھوں نے کہا کہ ہم وکلاء کو درخواست کریں گے کہ 9 مئی کے حوالے سے پیٹیشن دی جائے، نو مئی کے واقعات کی تحقیقات ہونی چاہئیں، ہزاروں بے گناہ لوگ جیلوں میں ہیں۔
ان کا کہنا تھا کہ بانی پی ٹی آئی نے کہا ہے کہ 9 مئی کے واقعات کی سی سی ٹی وی فوٹیجز کہاں ہیں ان فوٹیجز کے بغیر تحقیقات نہیں ہوسکتی، ہم پیٹیشن میں موقف اپنائیں گے کہ وہ تمام فوٹیجز سامنے لائی جائیں۔
علیمہ خان نے کہا کہ فوٹیجز میں نظر آنے والوں پر کیسز چلائیں، ہزاروں بے گناہ لوگ جیلوں میں ہیں، ہمیں بھی دہشت گرد کہا جارہا ہے، ہم پر بھی چار مقدمات ہیں جس میں کہا گیا ہم نے کور کمانڈر ہاوس، ن لیگ کے دفاتر جلائے، سی سی ٹی وی فوٹیجز سے پتا چلے گا کہ کس نے یہ جرم کیا ہے۔
