لاہور کے نواحی گاؤں چمروپور میں پی ٹی آئی رہنما خالد گجر کے بھائی کی فائرنگ سے ایک شخص جاں بحق جبکہ دو زخمی ہوگئے۔
پولیس کے مطابق خالد گجر کے بھائی کا مقصود گجر سے لین دین کا معاملہ تھا، فائرنگ سے مقصود گجر جاں بحق جبکہ محمود اور مقبول نامی اشخاص زخمی ہوئے۔
رائیونڈ پولیس نے خالد گجر کے بھائی نصیر گجر کو گرفتار کر لیا ہے، جبکہ زخمیوں کا علاج جاری ہے۔
پولیس کا کہنا ہے کہ زخمی اور جاں بحق تینوں آپس میں باپ بیٹے ہیں۔
دوسری جانب الیکشن کمیشن نے گرانڈ ڈیموکریٹک الائنس (جی ڈی اے) کے امیدوار کی کارنر میٹنگ میں ہوائی فائرنگ کا نوٹس لے لیا۔
پی ایس 105 کراچی ایسٹ میں ہوئی کارنر میٹنگ میں ہوائی فائرنگ کی ویڈیو وائرل ہوئی تو امیدوار کی ضابطہ اخلاق کی شق 17 کی خلاف ورزی کے باعث الیکشن کمیشن نے عرفان اللہ مروت کو اظہار وجوہ کا نوٹس جاری کر دیا۔
الیکشن کمیشن نے عرفان اللہ مروت کو دو روز میں تحریری جواب جمع کروانے کی ہدایت کی ہے۔
شوکاز نوٹس میں کہا گیا ہے کہ ہوائی فائرنگ طاقت کے مظاہرے اور مخالفین کو ہراساں کرنے کیلئے کی گئی۔
