متحدہ عرب امارات کی ایئر لائن ایمیریٹس نے کیبن کریو اور دیگر متعلقہ عہدوں پر پانچ ہزار نئی بھرتیوں کا اعلان کیا ہے۔

یہ اعلان ایمیریٹس کی طرف سے سالِ رواں کے دوران عالمی سطح پر بھرتیوں کا حصہ ہے۔

یہ ملازمتیں فضائی میزبانی کے علاوہ ہوا بازی کے دیگر شعبوں سے بھی متعلق ہیں۔

ایمیریٹس نے ایک بیان میں بتایا کہ A350 طیاروں کا نیا بیڑا خریدا جارہا ہے۔ اس کے نتیجے میں نئی بھرتیاں بھی کی جائیں گی۔ فلائٹ اٹینڈنٹ اور دیگر ملازمتوں کے لیے کوئی بھی درخواست دے سکتا ہے۔ اس حوالے سے اہلیت کے معیار کا بھی اعلان کردیا گیا ہے۔

انگریزی اور دیگر زبانیں بولنے کی صلاحیت پُرکشش اضافی قابلیت ہے۔ ملازمت کے خواہش مند افراد کے لیے ٹیم ورک کے حوالے سے ذہن تیار کرنا لازم ہوگا۔

بھرتی کے خواہش مند افراد کو متحدہ عرب امارات کے ورک ویزا کی اہلیت کے معیار پر بھی پورا اترنا ہوگا۔

ایمیریٹس نے بتایا ہے کہ سالِ رواں کے دوران اس کی ریکروٹمنٹ ٹیمیں دنیا بھر میں 460 مقامات پر امیدواروں کی قابلیت جانچیں گی اور انٹرویوز کریں گی۔ ایمیریٹس نے گزشتہ برس بھی کیبن کریو کے لیے 8 ہزار افراد کو بھرتی کیا تھا۔ اگست 2023 تک ایمریٹیس کے کیبن کریو کی تعداد 21500 ہوچکی تھی۔