لاہور ہائیکورٹ میں الیکشن اپیلٹ ٹربیونلز کے فیصلوں کے خلاف درخواستوں پر چیف جسٹس لاہور ہائیکورٹ کی جانب سے تشکیل کردہ فل بینچ نے 189 رٹ درخواستوں پر فیصلے جاری کیے۔
لاہور ہائیکورٹ کے 3 رکنی فل بینچ نے چوہدری پرویزالہٰی، فواد چوہدری اور حماد اظہر سمیت 54 درخواستوں پر فیصلے محفوظ کرلیے۔
چیف جسٹس لاہور ہائیکورٹ محمد امیر بھٹی نے جسٹس علی باقر نجفی کی سربراہی میں 3 رکنی فل بینچ قائم کیا، جسٹس شاہد بلال حسن اور جسٹس جواد حسن بھی فل بینچ کا حصہ ہیں۔
فل بینچ نے 10 جنوری سے الیکشن اپیلٹ ٹربیونلز کے فیصلوں کے خلاف دائر درخواستوں پر سماعت کا آغاز کیا۔
فل بینچ نے ہفتہ اور اتوار کو بھی رات دیر تک مقدمات کی سماعت کی، لاہور ہائیکورٹ کا فل بینچ مقدمات کے محفوظ کردہ فیصلے جلد سنائے گا۔
