بھارت میں ایک پرواز میں تاخیر پر مسافر نے مشتعل ہوکر پائلٹ کو مکا جڑ دیا۔ مسافر، ساحل کٹاریا، روانگی میں 13 گھنٹے کی تاخیر سے مشتعل ہوگیا تھا۔
شدید دھند کے باعث بھارت کے بہت سے علاقے سفر کے قابل نہیں۔ سڑکوں کے علاوہ فضائی سفر میں مشکلات پیش آرہی ہیں۔ دہلی سے گوا کی انڈیگو ایئر لائن کی پرواز میں دھند کے باعث 13 گھنٹے کی غیر معمولی تاخیر ہوئی تھی۔
اس حوالے سے وائرل ہونے والی وڈیو میں دیکھا جاسکتا ہے کہ پائلٹ جب شدید دھند کے باعث پرواز میں تاخیر کا اعلان کیا تو ساحل کٹاریا نے تیزی سے آگے بڑھ کر اسے مکا مارا۔ ساتھ کھڑی ہوئی فلائٹ اٹینڈنٹ نے فوراً اس کے اور مسافر کے درمیان کھڑے ہوکر کہا سر آپ ایسا نہیں کرسکتے۔
کپتان کی شکایت پر ساحل کٹاریا کے خلاف ایف آئی آر درج کرلی گئی ہے۔ ملزم ساحل کٹاریا کو طیارے سے اتار کر سینٹرل انڈسٹریل سیکیورٹی فورس کے حوالے کردیا گیا۔
اس وڈیو کے وائرل ہونے پر ملے جلے تبصرے سامنے آئے ہیں۔ بیشتر کا کہنا ہے کہ مسافر کے خلاف کارروائی ہونی چاہیے جبکہ چند ایک کا یہ بھی کہنا ہے کہ پروازوں میں غیر معمولی تاخیر سے مسافر چڑچڑے ہو جاتے ہیں۔
