امیر جماعت اسلامی سراج الحق کا کہنا ہے کہ عوام اگر غزہ و فلسطینی مسلمانوں کی مدد اور ڈاکٹر عافیہ کی رہائی چاہتے ہیں تو انتخابات میں جماعت اسلامی کے انتخابی نشان ترازو پر مہر لگائیں۔ حافظ نعیم الرحمان نے کہا ہے کہ ہمارے جذبات فلسطین کے مسلمانوں کے ساتھ ہیں۔ حجۃ الاسلام علامہ حسن ظفر نقوی نے کہا ہے کہ مسجد اقصیٰ آزاد ہوگی اور اسرائیل نیست و نابود ہوگا۔
غزہ میں اسرائیلی وحشیانہ کارروائیوں کے خلاف جماعت اسلامی نے شارع فیصل، کراچی میں غزہ ملین مارچ کا انعقاد کیا۔ جس میں بڑی تعداد میں کارکنان اور حجۃ الاسلام علامہ حسن ظفر نقوی اور دیگر نے بھی شرکت کی۔
سراج الحق نے مارچ سے خطاب میں کہا کہ اہل کراچی نے زبردست مارچ منعقد کر کے پیغام دیا وہ جاگ رہے ہیں، جماعت اسلامی نے ایک ارب چالیس کروڑ رقم فلسطینی مسلمانوں کے فنڈ میں جمع کروائی۔
انھوں نے کہا کہ عالم اسلام کی چوہتر لاکھ افواج نے فلسطینی مسلمانوں کے لیے کچھ نہیں کیا، ہم نے ایک ایک سفارتخانے پر دستک دی، افسوس عالم اسلام کے حکمرانوں اور اقوام متحدہ نے مجرمانہ خاموشی اپنائی ہوئی ہے۔
شرکاء سے خطاب میں جماعت اسلامی کراچی کے امیر حافظ نعیم الرحمان نے کہا کہ ہم فلسطین کے عوام کے ساتھ ہیں، اور ہم انتخابات میں بھی فلسطینیوں کو نہیں بھولے۔
انھوں نے کہا کہ اسرائیل ہمارے بچوں کا قتل عام کررہا ہے، ہم امریکا کے ایجنٹوں سے لڑتے ہیں۔
امیر جماعت اسلامی کراچی حافظ نعیم الرحمان نے کہا کہ ہم انتخابات کو بھی عبادت سمجھ کر لڑتے ہیں۔
مارچ میں بڑی تعداد میں کارکنان نے شرکت کی اس موقع پر خواتین اور بچے بھی مارچ میں شریک رہے۔
مظاہرین نے مظلوم فلسطینیوں سے اظہار یکجہتی کیا جبکہ اسرائیل کے خلاف نعرے لگائے گئے۔
مارچ کے شرکاء سے خطاب میں علامہ حسن ظفر نقوی نے کہا کہ حماس کے مجاہدین اور اہل غزہ نے دنیا بھر میں اسلامی تحریکوں کو ایک جگہ جمع کردیا ہے۔
انھوں نے کہا کہ پوری دنیا کے عوام اہل غزہ و فلسطین سے اظہار یکجہتی کے لیے سڑکوں پر موجود ہیں۔
ان کا کہنا تھا کہ فلسطینیوں کا خون اور شہادتیں رائیگاں نہیں جائیں گی۔ مسجد اقصیٰ آزاد ہوگی اور اسرائیل نیست و نابود ہوگا۔
