پاکستان تحریک انصاف (پی ٹی آئی) کے سابق چیئرمین عمران خان کی کمرہ عدالت میں صحافیوں سے غیر رسمی گفتگو کے دوران توشہ خانہ سمیت اہم سوالات اٹھائے گئے۔
اسلام آباد کی احتساب عدالت میں صحافیوں سے غیر رسمی گفتگو کرتے ہوئے سابق وزیراعظم عمران خان نے کہا کہ توشہ خانہ کیس میں آفس بوائے کو وعدہ معاف گواہ بنایا گیا، کیا میں آفس بوائے کے ذریعے اربوں کی کرپشن کروں گا۔
صحافی نے سابق چیئرمین پی ٹی آئی سے سوال کیا کہ سپریم کورٹ نے نااہلی ختم کردی، اس پر آپ کیا کہیں گےَ؟ جس کے جواب میں عمران خان نے کہا کہ سپریم کورٹ کے فیصلے پر بات نہیں کروں گا۔
صحافی نے پھر سوال کیا کہ تاحیات نااہلی ختم ہونے سے ہوسکتا ہے مستقبل میں آپ کو بھی فائدہ ہو، جس پر سابق وزیراعظم کا کہنا تھا کہ اس پر کچھ نہیں کہوں گا، ہم نے مخالفین پر کیسز نہیں بنائے تھے، کیسز پرانے تھے۔
صحافی نے عمران خان سے ایک اور سوال کیا کہ شیخ رشید کو امیدوار کھڑا کریں گے، جس کے جواب میں سابق چیئرمین پی ٹی آئی نے کہا کہ سیاسی ٹیم فیصلہ کرے گی کون سا امیدوار کھڑا کرنا ہے۔
