ہائر ایجوکیشن کمیشن (ایچ ای سی) نے کمپیوٹر سائنس اور آئی ٹی گریجویٹس کے لیے منعقد ہونے والے سینٹرلائزڈ ٹیسٹ میں رجسٹریشن کی آخری تاریخ میں 3 جنوری 2024 تک توسیع کر دی ہے، تاہم ٹیسٹ کی تاریخ 7 جنوری 2024 کو برقرار رہے گی۔

رجسٹریشن کی ڈیڈ لائن میں توسیع کا فیصلہ تمام سرکاری اور نجی شعبے کے ایچ ای آئیز کے وائس چانسلرز اور کمپیوٹر سائنس و آئی ٹی کے شعبہ جات کے سربراہان کی ایک ورچوئل میٹنگ میں کیا گیا تاکہ اس بات کو یقینی بنایا جاسکے کہ زیادہ سے زیادہ اہل طلباء سبجیکٹ ٹیسٹ کے لئے خود کو رجسٹر کریں اور اس موقع سے فائدہ اٹھائیں۔

چیئرمین ایچ ای سی نے یونیورسٹیوں بالخصوص آئی ٹی اور کمپیوٹر سائنس ڈپارٹمنٹس کو مشورہ دیا ہے کہ وہ اس بات کو یقینی بنائیں کہ ساتویں سمسٹر کے طلبہ اپنا اندراج کرائیں اور ٹیسٹ میں حصہ لیں۔ انہوں نے ایچ ای آئیز پر زور دیا کہ وہ ٹیسٹ کے تمام پہلوؤں کے بارے میں ہموار مواصلات کے لئے اپنے فوکل پرسنز کی نامزدگی میں تیزی لائیں۔

انہوں نے کہا کہ اس اقدام کا بنیادی مقصد اس بات کو یقینی بنانا ہے کہ آئی ٹی گریجویٹس کو ہمیشہ بدلتی ہوئی آئی ٹی صنعت میں مہارت حاصل کرنے کے لئے ضروری مہارتوں ، علم اور خصوصیات سے لیس کیا جائے۔

ایچ ای سی کے مطابق تسلیم شدہ سرکاری اور نجی شعبے کی یونیورسٹیوں اور ملحقہ کالجوں میں پیش کردہ کمپیوٹر سائنس اور آئی ٹی سے متعلق مضامین کے ساتویں سمسٹر میں داخلہ لینے والے طلباء، ورچوئل یونیورسٹی (وی یو) لنک( https://www.vu.edu.pk/GraduateTest/) کے ذریعہ اندراج کرسکتے ہیں۔