وفاقی دارالحکومت اسلام آباد کے سیکٹر ایچ میں قائم سینٹ جونز عوامی چرچ کے پادری نے دعویٰ کیا ہے کہ مسلح افراد نے کرسمس کے دوسرے روز چرچ پر حملہ کیا۔ اسلام آباد پولیس نے حملے کی ایف آئی آر درج کرلی ہے۔
تفصیلات کے مطابق پادری عمران مسیح نے آئی نائن تھانے میں ایف آئی آر درج کروائی، جس میں دعویٰ کیا گیا کہ ہتھیاروں سے لیس چھ افراد 26 دسمبر کی رات ساڑھے آٹھ بجے کے قریب ایچ نائن میں سینٹ جانزعوامی چرچ میں گھس گئے تھے۔
پادری نے بتایا کہ واقعے کے وقت چرچ میں دعائیہ تقریب جاری تھی، چھ افراد میں سے تین کی شناخت سہیل، آصف چٹھہ اور مٹھو کے نام سے کی گئی۔
پادری عمران مسیح نے مزید کہا کہ سہیل کے پاس سب مشین گن تھی جبکہ دیگر کے پاس پستول تھے۔
پادری نے دعویٰ کیا کہ ان افراد نے نہ صرف چرچ کو تالا لگایا، اندر موجود لوگوں کو مارا پیٹا اور ساؤنڈ سسٹم چھین لیا بلکہ وہ بابر مسیح اور عارف گلزار نامی دو افراد کو بھی اپنے ساتھ لے گئے۔
عمران مسیح نے ایف آئی آر میں یہ بھی دعویٰ کیا ہے کہ مسلح افراد نے جان سے مارنے کی دھمکیاں دی تھیں۔
