لاہور ہائیکورٹ راولپنڈی بینچ نے آئی جی پنجاب اور آر پی او راولپنڈی سے پاکستان تحریک انصاف (پی ٹی آئی) کے رہنما راجہ بشارت کے خلاف مقدمات اور راجہ راشد حفیظ کو ہراساں اور گرفتار کرنے سے روکتے ہوئے سائل کے خلاف 9 مئی مقدمات کی تفصیلات بھی طلب کرلیں۔
لاہور ہائیکورٹ راولپنڈی بینچ کے جسٹس چوہدری عبدالعزیز نے تحریک انصاف کے رہنماؤں کی رٹ پیٹشنز پر الگ الگ سماعت کی۔
پی ٹی آئی رہنما راجہ بشارت کی جانب سے سردار عبدالرازق خان ایڈووکیٹ نے عدالت میں مؤقف اختیار کیا کہ راجہ بشارت قومی و صوبائی اسمبلی کے امیدوار ہیں، وہ بے گناہ جی ایچ کیو حملہ کیس میں نامزد کیا گیا، موقع پر موجود بھی نہیں تھے۔
وکیل نے کہا کہ راجہ بشارت پشاور ہائیکورٹ سے حفاظتی ضمانت پر ہیں، میرے مؤکل کو الیکشن سے روکنے کے لیے خفیہ مقدمات میں نام ڈال دیا گیا ہے، پولیس اور حکومت کی جانب سے مقدمات کی تفصیلات فراہم نہیں کی جا رہیں۔
جس پر عدالت نے آئی جی پنجاب اور آر پی او راولپنڈی سے راجہ بشارت کے خلاف درج مقدمات کی تفصیلات طلب کرلیں۔
دوسری جانب اسی عدالت نے پی ٹی آئی کے سابق صوبائی وزیر راجہ راشد حفیظ کی پٹیشن پر انہیں ہراساں اور گرفتار کرنے سے روکتے ہوئے سائل کے خلاف 9 مئی سمیت درج تمام مقدمات کی تفصیلات طلب کرلیں۔
