بھارتی ریاست تلنگانہ میں باراتیوں کے لیے کھانے میں بکرے کی ہڈیوں کا گودا گوشت شامل نہ کیے جانے پر منگنی کی تقریب کے دوران رنگ میں بھنگ پڑ گیا۔ واقف حال افراد کا کہنا ہے کہ دولہا کے گھر والے تیلگو فلم سے متاثر تھے۔
دولہا کے اہل خانہ اس بات پر ناراض تھے کے پہلے سے طے کیے جانے کے باوجود مینو میں مٹن بون میرو کیوں نہیں رکھا گیا۔
دلہن کا تعلق نظام آباد سے جبکہ دولہا جگتیال سے تھا۔ دلہن کی رہائشگاہ پر منعقدہ اس منگنی میں دلہن کے گھر والوں نے مہمانوں کے لیے نان ویجیٹیرین مینو کا انتظام کیا تھا جس میں ان کے اہل خانہ اور دولہا کے رشتہ دار بھی شامل تھے۔
تقریب کے بعد اس وقت جھگڑا شروع ہو گیا جب مہمانوں نے نشاندہی کی کہ کھانے میں مٹن کی ہڈیوں کا گودا تو ہے ہی نہیں، میزبانوں کی جانب سے اس بات کی تصدیق کے بعد کہ پکوانوں میں ہڈیوں کا گودا شامل نہیں کیا گیا، یہ تنازع مزید بڑھ گیا۔
کچھ ہی دیر میں اس معاملے میں پولیس بھی شامل ہوگئی۔ مقامی پولیس اسٹیشن کے عہدیداروں نے دولہا کے اہل خانہ کو لڑائی کو حل کرنے کے لیے قائل کرنے کی کوشش کی لیکن انہوں نے اپنی خواہش رد کیے جانے ”توہین“ قرار دیا۔
دولہا کے اہل خانہ کا کہنا تھا کہ دلہن کے گھر والوں نے جان بوجھ کر یہ چھپایا کہ ہڈیوں کا گودا مینو میں نہیں تھا۔
آخر کار منگنی کی تقریب کا اختتام اس کی منسوخی پر ہوا۔
بہت سے افراد کا کہنا ہے کہ یہ واقعہ ایک انتہائی مشہورتیلگو فلم کے پلاٹ سے ملتا جلتا ہے۔ مارچ میں ریلیز ہونے والی فلم ’بالاگام‘ میں دکھایا گیا تھا کہ دونوں خاندانوں کے درمیان مٹن بون میرو پر تنازع کے بعد ایک شادی منسوخ کردی گئی۔
