قومی کرکٹر شاداب خان کا کہنا ہے کہ ورک لوڈ کی وجہ سے انجریز ہورہی ہیں، بابر اور رضوان سمیت سارے ہی میرے دوست ہیں۔
قومی کرکٹ ٹیم کے آل راؤنڈر شاداب خان نے میڈیا سے بات کرتے ہوئے کہا کہ جنوری کے پہلے ہفتے میں فٹ ہوجاؤں گا، اور فٹ ہونے کے بعد پریذیڈنٹ ٹرافی اور آئی ایل ٹی ٹونٹی کھیلوں گا، ابرار کافی عرصے سےکرکٹ کھیل رہا ہے، ورک لوڈ کی وجہ سے بھی ہمارے اسپنرز میں انجریز ہورہی ہیں۔
آسٹریلیا سے ٹیسٹ میچ ہارنے کے حوالے سے بات کرتے ہوئے قومی کرکٹر نے کہا کہ ہم بطور قوم بہت جلدی باتیں شروع کر دیتے ہیں، ایک میچ ہارنے سے کچھ نہیں ہوتا، یہ ٹیم میچ جیتنے نہیں سیریز جیتنے گئی ہے، میلبرن اور سڈنی کی وکٹیں پاکستان کو سوٹ کرتی ہیں، دونوں میچوں میں نتائج پاکستان کے حق میں آئیں گے۔
شاداب خان کا کہنا تھا کہ شاہین آفریدی کافی عرصے سے اچھی پرفارمنس دے رہا ہے، وہ کافی عرصے بعد ٹیسٹ کرکٹ کھیل رہا ہے، اس لیے ردھم میں آنے میں وقت لگتا ہے، بابر اعظم اور محمد رضوان سمیت سارے میرے دوست ہیں، آخری دو سالوں سے لاہور قلندرز ہمیں ہرا رہی ہے، اس بار پی ایس ایل میں لاہور قلندرز کو ٹکر دیں گے۔
