تھانہ صدر کے علاقے میں پیسوں کے لین کے معاملے پر زمیندار نے غریب کسان کو قتل کردیا، مقتول کسان کی شناخت منصب نامی شخص سے ہوئی۔

چنیوٹ میں تھانہ صدر کے علاقے 10 چک گجراں میں چارے کے پیسے مانگنے پر بااثر زمیندار نے طیش میں آکر غریب کسان کو فائرنگ کرکے قتل کردیا، اور فرار ہوگیا۔

تھانہ صدر پولیس کے مطابق مقتول کسان کی شناخت منصب کے نام سے ہوئی ہے، جس نے زمیندار سے چارے کے 4000 ہزار روپے مانگے تھے، جس پر زمیندار نے فائرنگ کرکے اسے قتل کردیا۔

پولیس نے بتایا کہ بااثر زمیندار موقع سے فرار ہوگیا ہے، اور تفتیش پر پتہ چلا کہ قاتل نشے کا عادی ہے۔

حکام کے مطابق واقعے کا مقدمہ تھانہ صدر میں درج کرلیا گیا ہے، جب کہ مقتول کی لاش پوسٹ مارٹم کے لیے ڈی ایچ کیو اسپتال منتقل کردی گئی ہے۔