پاکستان تحریک انصاف (پی ٹی آئی) کے رہنما اعظم سواتی نے مسلم لیگ (ن) کے قائد نواز شریف کے مقابلے میں حلقہ این اے 15 مانسہرہ سے کاغذات نامزدگی جمع کرا دیے ہیں۔
عام انتخابات کے لیے کاغذات نامزدگی جمع کرانے کا آج آخری روز ہے، اسی وجہ سے انتخابی امیدوارں نے بھاگ دوڑ تیز کردی ہے۔
پی ٹی آئی کارکنان ریلی کی صورت میں اعظم سواتی کے کاغذات جمع کرانے ریٹرنگ آفیسر کے پاس پہنچے اور سابق صدر ڈسٹرکٹ بار عامر خان نے اعظم سواتی کے کاغذات جمع کرائے۔
کاغذات جمع کرانے کے بعد میڈیا سے گفتگو کرتے ہوئے عامر خان ایڈووکیٹ نے کہا کہ اعظم خان سواتی اسی مٹی سے ہیں، نواز شریف سے زبردست مقابلہ ہوگا۔
انہوں نے کہا کہ حکومتی مشینری کا استعمال اپنی جگہ مگر ووٹ عوام کے ہاتھ میں ہے۔
دوسری جانب لیگی رہنما بلال یاسین نے میڈیا سے گفتگو میں کہا کہ نواز شریف لاہور اور مانسہرہ سے الیکشن لڑیں گے۔
بلال یاسین کا کہنا تھا کہ نواز شریف نے سات سال سزا کاٹی، عدالتوں نے انہیں بری کیا، لیول پلیئنگ فیلڈ کو آج کے حالات سے نہ ملایا جائے۔
لیگی رہنما مریم نواز نے بھی پی پی 80 شاہ پور سرگودھا سے کاغذات نامزدگی جمع کرادیے۔ رہنما مسلم لیگ ن خرم دستگیر کا کہنا ہے کہ انہوں نے اپنے کاغذات نامزدگی این اے 78 کے لئے جمع کروائے ہیں۔
خرم دستگیر کا کہنا تھا کہ لیول پلئینگ فیلڈ کو آگ پی ٹی آئی نے 9 مئی کو خود لگائی، ان کا خیال تھا پلیئنگ فیلڈ ان کی جاگیر ہے۔
خرم دستگیر نے کہا کہ پاکستان کا سیاسی ارتقاء ہورہا ہے، پہلے الیکشن اتنی دیر سے غیر یقینی میں ہوتے تھے، ہر الیکشن سیاسی میلے کا سماں ہوتا تھا اب یہ قومی فریضہ بنتا جا رہا ہے۔
ان کا کہنا تھا کہ پاکستان کی عوام کی سنجیدگی ظاہر کررہی ہے، 12 جنوری کے بعد پورے ملک میں اس پر فوکس کریں گے کہ بچوں کا مستقبل کس کے حوالے کرنا ہے۔
استحکام پاکستان پارٹی کے سربراہ جہانگیر ترین خان نے بھی تین حلقوں سے الیکشن لڑنے کا فیصلہ کیا ہے۔ جہانگیر ترین این اے 155 لودھراں اور پی پی 227 لودھراں سے انتخابات میں حصہ لیں گے۔
جہانگیر ترین این اے 149 ملتان اور پی پی 227 سے بھی کاغذات نامزدگی جمع کرائیں گے۔ قبل ازیں، جہانگیر ترین این اے 155 سے کاغذات نامزدگی جمع کراچکے ہیں۔
