محکمہ موسمیات کی جانب سے کراچی سمیت دیہی سندھ کے مختلف اضلاع میں آسمانی بجلی کی اطلاع دینے والے 6 لائٹننگ ڈیٹیکٹرز نصب کیے جائینگے۔ گزشتہ ماہ چین نے پاکستان کو آسمانی بجلی کی پیشگی اطلاع کیلئے ڈیٹیکٹرز تحفے میں دیے تھے۔

محکمہ موسمیات کا کہنا ہے کہ کراچی میں نصب ہونے والا لائٹننگ ڈیٹیکٹر بیک وقت لانگ اور شارٹ رینج کا حامل ہوگا، ملک بھر میں نصب ہونے والے 25 لائٹننگ ڈیٹیکٹرز چین کی جانب سے تحفے میں دیے گئے ہیں۔ چین کے انسٹیٹوٹ آف الیکٹریکل انجینئرنگ چائنیز اکیڈمی آف سائنسز نے آلات کو تیار کیا ہے۔

پاکستان میں اس سے قبل آسمانی بجلی گرنے کی پیشگی اطلاع کا جدید نظام موجود نہیں تھا، لائٹننگ ڈیٹیکٹر100مربع کلومیٹر میں آسمانی بجلی کے گرنے کی پیشگی اطلاع دے سکتا ہے۔

اس حوالے محکمہ موسمیات کا مزید کہنا ہے کہ بارشوں کے سسٹم کی گرج چمک کے دوران آسمانی بجلی کے تشکیل پانے والی شدت کا اندازہ لگایا جاسکے گا، نصب آلات کے ذریعے آسمانی بجلی گرنے کے واقعات کا ڈیٹا جمع کیا جائےگا، اور مستقبل میں ڈیٹا غیرمعمولی موسمیاتی حالات کے دورن معاون ثابت ہوگا۔

محکمہ موسمیات کے مطابق موسمیاتی تغیر (کلائمٹ چینج) کی وجہ سے ہونے والی غیرمعمولی سرگرمیوں میں آسمانی بجلی کے گرنے کے واقعات بھی شامل ہیں، تیزبارشوں کے دوران ماضی میں اور حالیہ دنوں میں تھرپارکر میں بجلی گرنے کے متعدد واقعات پیش آچکے ہیں۔