پشاور ہائیکورٹ نے حکومت کو پاکستان تحریک انصاف کے سینئر نائب صدر شیر افضل مروت کے خلاف کارروائی سے روک دیا۔
پشاور ہائیکورٹ کے چیف جسٹس ابراہیم خان اور جسٹس اشتیاق ابراہیم نے پی ٹی آئی رہنما شیر افضل مروت کی ضمانت کے لیے کیس کی سماعت کی۔
وکیل درخواست گزار نے عدالت کو بتایا کہ شیرافضل مروت کے خلاف 5 کیسز ہیں لیکن شیر افضل مروت کو کوٹ لکھپت جیل سے گزشتہ روز رہا کیا گیا اس لیے آج عدالت میں پیش نہ ہوسکتے۔
چیف جسٹس پشاور ہائیکورٹ نے سوال کیا کہ کیا شیر افضل مروت آئندہ سماعت پر پیش ہوسکتے ہیں؟ جس پر وکیل درخواست گزار نے کہا کہ پیشی کے لیے ایک ہفتے کا وقت دیا جائے۔
عدالت نے شیر افضل مروت کو آئندہ سماعت پر پیش ہونے کا حکم دیتے ہوئے حکومت کو ان کے خلاف آئندہ سماعت تک کارروائی سے روک دیا اور سماعت 26 دسمبر تک ملتوی کردی۔
