سابق وفاقی وزیر اور سینئیر سیاستدان محمد علی درانی کا کہنا ہے کہ دہشت گردوں کے پاس امریکی اسلحہ کہاں سے آیا اس کی تحقیقات کرائی جائیں، اور دہشت گردی کے خاتمے کیلئے امریکا جدید ٹیکنالوجی سے پاکستان کی مدد کرے۔
اپنے ایک بیان میں سابق وفاقی وزیر محمد علی درانی کا کہنا تھا کہ پاکستان پر دہشت گردی کی نئی جنگ مسلط کی جارہی ہے، امریکی اسلحے سے دہشت گرد پاکستان کے خلاف جنگ کر رہے ہیں۔
محمد علی درانی نے کہا کہ دہشت گردوں کے پاس امریکی اسلحہ کہاں سے آیا، تحقیقات کرائی جائیں، دہشتگردوں کو جدید اسلحے کی فراہمی نہ روکی گئی تو خدانخواستہ ایک اور نائن الیون کا امکان رد نہیں کیا جاسکتا، دہشت گردوں کے پاس جدید ترین اسلحہ اور ٹیکنالوجی کی موجودگی عالمی وعلاقائی امن کے لئے سنگین خطرہ ہے۔
سابق وفاقی وزیر نے مطالبہ کیا کہ دہشت گردی کے خاتمے کیلئے امریکا جدید ٹیکنالوجی سے پاکستان کی مدد کرے، یہ خود امریکا اور دنیا کے امن کے مفاد میں ہے۔
