اگر آپ کرکٹ کے شوقین ہیں تو جانتے ہوں گے کہ اگر بالر وکٹ اڑانے میں کامیاب ہوجائے تو فوراً آؤٹ دے دیا جاتا ہے۔ لیکن کیا کبھی آپ نے ایسا دیکھا ہے بالر نے لیگل بال سے مڈل اسٹمپ اڑا دیا ہو لیکن پھر بھی آؤٹ نہ دیا جائے؟
سننے میں عجیب لگتا ہے لیکن ایسا ہی ایک عجیب واقعہ آسٹریلا میں ایک میچ کے دوران پیش آیا، جس نے امپائر سمیت تمام دونوں ٹیموں کے کھلاڑیوں کو چکرا دیا۔
آسٹریلیا میں مقامی ”ACT پریمیئر کرکٹ تھرڈ گریڈ“ میچ کے دوران بولر نے مڈل اسٹمپ کامیابی سے اڑایا لیکن لیکن حیران کن طور پر بیلز گرنے کے بجائے اپنی جگہ برقرار رہے۔
دی کینبرا ٹائمز کی رپورٹ کے مطابق گننڈرا کرکٹ کلب کے باؤلر اینڈی رینالڈز نے حریف ٹیم کے اوپنر میتھیو بوسٹو کو کلین بولڈ کیا اور مڈل سٹمپ پر گیند لگتی دیکھ کر جشن منانا شروع کر دیا، جبکہ بوسٹو نے بھی ڈگ آؤٹ کی طرف چلنا شروع کر دیا۔
لیکن امپائر نے دیکھا کہ اسٹمپ اڑنے کے باوجود بیلز ابھی بھی اپنی جگہ پر موجود ہیں اور گرے نہیں۔
اس کے بعد دونوں آن فیلڈ امپائروں کے درمیان طویل بات چیت ہوئی اور آخر میں بوسٹو کو کھیل کے قوانین کی وجہ سے ناٹ آؤٹ قرار دے دیا گیا۔
میریلیبون کرکٹ کلب کے قانون کے مطابق ’وکٹ اس وقت ٹوٹی قرار پائے گی جب اسٹمپ کے اوپر سے کم از کم ایک بیل مکمل طور پر ہٹ جائے یا ایک یا زیادہ اسٹمپس زمین سے اکھڑ جائیں‘۔
لیکن اس مقع پر نہ تو بیلز نیچے گری تھیں اور نہ ہی درمیانی اسٹمپ زمین سے اکھڑی تھی۔
اگر بیل نہ گرنے کے باوجود اسٹمپ زمین سے اکھڑ جاتی تو بلے باز کو آؤٹ قرار دے دیا جاتا۔
حریف ٹیم ویسٹس کلب کے کپتان سیم وائٹ مین نے بعد میں اعتراف کیا کہ اس ڈلیوری میں جو کچھ سامنے آیا تھا وہ اسے دیکھ کر حیران رہ گئے اور بعد میں اس بلے باز کے بچ جانے پر مایوس ہوئے۔
سوشل میڈیا پیج ’ThatsSoVillage‘ نے اس واقعے کی وائرل تصویر کو بھی شیئر کیا۔
شائقین نے رینالڈس کو سب سے بدقسمت بولر قرار دیا۔
