مال روڈ کو ہر قسم کی ٹریفک کے لئے بند کردیا گیا ہے اور صرف سائیکل سواروں کو روڈ سے گزرنے کی اجازت ہوگی، سی ٹی او لاہور نے کہا ہے کہ شہری پریشانی سے بچنے کے لیے مال روڈ پر سفر نہ کریں۔
چیف ٹریفک آفیسر (سی ٹی او) لاہور مستنصر فیروز نے کہا ہے کہ مال روڈ لاہور بروز اتوار ہر قسم کی ٹریفک کے لیے بند ہو گا۔
سی ٹی او لاہور نے کہا کہ اتوار کے روز صرف سائیکل سوار اور پیدل شہری مال روڈ کو استعمال کرسکیں گے۔
مستنصر فیروز نے کہا کہ حکومت پنجاب کی طرف سے اسموگ کے پیش نظر فیصلہ کیا گیا ہے، شہری پریشانی سے بچنے کے لیے مال روڈ پر سفر نہ کریں۔
پنجاب حکومت نے اسموگ کے تدارک کے حوالے سے اتوار کے روز کے لیے نیا حکم نامہ جاری کردیا، اتوار کے روز پنجاب کے 6 ڈویژنز میں تمام مارکیٹس بھی بند رکھنے کا اعلان کر دیا گیا۔
ریلیف کمشنر پنجاب نبیل جاوید کی جانب سے جاری کیے گئے نئے حکم نامے کے مطابق پنجاب حکومت نے اسموگ کے تدارک کے لیے اتوار کے روز 6 ڈویژنز میں تمام مارکیٹس بند رکھنے کا اعلان کیا ہے، اس پابندی کا اطلاق لاہور، گوجرانوالہ، فیصل آباد، سرگودھا، ملتان اور ساہیوال ڈویژن کے تمام اضلاع پر ہو گا۔
نوٹیفکیشن کے مطابق اتوار کے روز ریسٹورنٹس 4 بجے کے بعد کھولنے کی اجازت ہو گی تاہم فارمیسیز، میڈیکل و کریانہ سٹورز، بیکریز، پیٹرول پمپس، یوٹیلیٹی اسٹورز، کال سنٹرز اور انٹرنیشنل آئی ٹی سنٹرز کو پابندی سے مستثنیٰ قرار دیا گیا ہے۔
نوٹیفکیشن میں تمام شہریوں کو آؤٹ ڈور میں ماسک پہننے کی بھی ہدایت کی ہے۔ اس سے قبل ریلیف کمشنر نے مارکیٹس 4 بجے کھولنے کا نوٹیفکیشن کیا تھا۔
اسموگ کے حوالے سے نگراں وزیراعلیٰ پنجاب محسن نقوی کی ہدایت پر ریلیف کمشنر پنجاب نبیل جاوید نے اتوار کے روز لاک ڈاؤن کا حکم دے دیا۔
اسموگ سے متاثرہ اضلاع میں نقل و حمل مزید محدود کرنے کا فیصلہ کرلیا گیا۔
ریلیف کمشنر پنجاب نبیل جاوید نے متاثرہ اضلاع میں پابندیوں کا نوٹیفکیشن جاری کر دیا، جس کے مطابق گوجرانوالہ، ملتان، سرگودھا، فیصل آباد اور ساہیوال ڈویژنز کے تمام اضلاع پر پابندیاں لاگو ہوں گی، اتوار کے روز بازار دن 4 بجے کے بعد کھولے جا سکیں گے۔
نوٹیفکیشن کے مطابق فارمیسیز، میڈیکل اسٹورز، کریانہ اسٹورز اور بیکریز کو پابندی سے استثنیٰ قرار دیا گیا ہے جبکہ پیٹرول پمپس، یوٹیلیٹی اسٹورز، کال سینٹرز اور انٹرنیشنل آئی ٹی سینٹرز پر بھی پابندیوں کا اطلاق نہیں ہوگا، پہلے سے طے شدہ امتحانات اور انٹری ٹیسٹ بھی شیڈول کے مطابق ہوں گے۔
ریلیف کمشنر نبیل جاوید نے متعلقہ اضلاع کی انتظامیہ کو اسمارٹ لاک ڈاؤن یقینی بنانے کی ہدایات جاری کردیں۔
ریلیف کمشنر نے کہا کہ افسر فیلڈ میں موجود رہیں اور احکامات پر عملدرآمد یقینی بنائیں، گزشتہ 2 روزہ لاک ڈاؤن سے اسموگ میں کمی واقع ہوئی ہے۔
نبیل جاوید نے مزید کہا کہ شہری ماسک کا استعمال یقینی بنائیں، عوام غیر ضروری سفر سے گریز کریں اور بچوں کا خاص خیال رکھیں، اسموگ جیسی خطرناک آفت کا مقابلہ مل کر کرنا ہو گا، شہری موجودہ صورتحال میں انتظامیہ سے تعاون کریں۔
ادھر صوبائی حکومت کے اقدامات اور نگراں وزیراعلیٰ پنجاب محسن نقوی مسلسل انسداد سموگ مہم کی نگرانی کے باعث لاہور کے ائیرکوالٹی انڈکس میں بہتری آئی ہے۔
اسموگ: لاہور ہائیکورٹ کا ڈی سیل ہونے والی 84 فیکٹریوں کو دوبارہ سیلکرنے کا حکم
لاہور، سیف سٹی نے 130 سے زائد دھواں چھوڑتے عناصر کی نشاندہیکردی
اس حوالے سے نگراں وزیراعلیٰ پنجاب محسن نقوی نے سماجی روابطے کی ویب سائیٹ ایکس (ٹوئٹر) پر جاری اپنے پیغام کہا کہ لاہور میں ہمارے انسداد اسموگ اقدامات کے مثبت اثرات پر شکر گزار ہوں۔
انہوں نے اپنے پیغام میں بتدریج 23، 24 اور 25 نومبر کو لاہور میں ایئرکوالٹی انڈیکس ریڈنگ بھی لکھی جس کے مطابق لاہور میں ایئرکوالٹی انڈیکس 454 سے کم ہوکر 232 تک پہنچ چکا ہے۔
وزیراعلیٰ محسن نقوی نے پیغام کے آخر پر لکھا کہ ’آئیے صحت مند، صاف ہوا کے لیے اس مثبت رجحان کو برقرار رکھیں‘۔
