اسلام آباد کی مقامی عدالت نے درخواست قبل از گرفتاری کی سماعت میں اسد عمر کی حاضری سے استثنیٰ کی درخواست اعتراض کے ساتھ واپس کردی۔

ایڈیشنل سیشن جج عبدالغفور کاکڑ کے رخصت کے باعث ڈیوٹی جج محمد سہیل نے اسد عمر کی درخواست ضمانت قبل از گرفتاری پر سماعت کی۔

اسد عمر کی وکیل ایڈوکیٹ آمنہ علی نے حاضری سے استثنیٰ کی استدعا کرتے ہوئے بتایا کہ اسد عمر بیماری کے باعث پیش نہیں ہو سکے، انہیں حاضری سے استثنیٰ دیا جائے۔

یہ بھی پڑھیں: اسد عمر کا سیاست سے علیحدگی کا اعلان، پی ٹی آئی کی بنیادی رکنیت سے مستعفی

جج نے ریمارکس دیئے کہ اگر بیمار ہیں تو بیماری کا ثبوت ہونا چاہیے، میڈیکل سرٹیفکیٹ درخواست کے ساتھ لگائیں، عدالت نے درخواست اعتراض کے ساتھ واپس کردی۔

واضح رہے کہ اسد عمر نے تھانہ سیکرٹریٹ میں درج مقدمے میں ضمانت کے لئے درخواست دائر کی تھی۔