ضلع خیبر کے علاقے وادی تیراہ میں دہشت گردوں کے خلاف آپریشن کے دوران شہید ہونے والے لیفٹیننٹ کرنل حسن حیدر کی نمازجنازہ چکلالہ گیریژن راولپنڈی میں ادا کی گئی، شہید کو پورے فوجی اعزاز کے ساتھ اسلام آباد میں سپرد خاک کردیا گیا۔
ترجمان پاک فوج کے مطابق 42 سالہ لیفٹیننٹ کرنل محمد حسن حیدر کی نماز جنازہ میں نگراں وزیراعظم انوار الحق کاکڑ، آرمی چیف جنرل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے شرکت کی۔
اس کے علاوہ وزیر دفاع، اعلیٰ فوجی و سول افسران، سپاہیوں، شہریوں اور شہید کے لواحقین نے بھی بڑی تعداد میں شرکت کی۔
وادی تیراہ خیبر میں شہید دیگر شہداء میں31 سالہ نائیک خوشدل خان ساکن ضلع لکی مروت، 27 سالہ نائیک رفیق خان اور 33 سالہ لانس نائیک عبدالقادرکی نماز جنازہ بھی ان کے متعلقہ آبائی شہر وں میں ادا کردی گئی۔
ترجمان پاک فوج کا کہنا ہے پاکستان کی مسلح افواج مادر وطن سے دہشت گردی کی لعنت کے ہر قیمت پر خاتمے کے لیے پرعزم ہیں۔
