الیکشن کمیشن آف پاکستان (ای سی پی) کے ترجمان نے چیف الیکشن کمشنر کے خلاف پاکستان تحریک انصاف (پی ٹی آئی) کے بیان کو بے بنیاد اور حقائق کے منافی قرار دے دیا۔
اسلام آباد سے جاری بیان میں الیکشن کمیشن کے ترجمان نے کہا کہ چیف الیکشن کمشنر کے خلاف پی ٹی آئی کا مبینہ بیان حقائق کے منافی ہے، پی ٹی آئی یاد رکھے 2022 کے ضمنی انتخابات کے دوران الیکشن کمیشن کی غیرجانبداری مثالی تھی، ان الیکشنز میں الیکشن کمیشن نے انتخابی شفافیت کا ثبوت اپنے عمل سے پیش کیا۔
الیکشن کمیشن کے ترجمان نے کہا کہ ضمنی انتخابات کی شفافیت کو ہر سطح پر سراہا گیا، پی ٹی آئی یاد رکھے الیکشن کمیشن اور چیف الیکشن کمشنر نہ ان کے دور میں دباؤ میں آیا، نہ ابھی اور نہ آئندہ آئے گا، آئین و قانون کے تحت ذمہ داریاں بغیر کسی دباؤ اور بلا خوف و خطر سرانجام دیتے رہیں گے۔
ترجمان نے مزید کہا کہ ایسے وقت میں جب افہام و تفہیم سے عام انتخابات کی تاریخ مقرر کی گئی ہے، ایسا بیان ماحول کو خراب کرنے کی ناکام کوشش ہے۔
ترجمان الیکشن نے یہ بھی کہا کہ الیکشن کمیشن جیسے آئینی ادارے کو ایسے اوچھے ہتھکنڈوں سے دباؤ میں نہیں لایا جاسکتا، بہتر ہے مذکورہ پارٹی الزامات لگانے کی بجائے اپنی توجہ عام انتخابات کی تیاری پر مرکوز کرے۔
الیکشن کمیشن کے ترجمان نے کہا کہ کمیشن آئندہ انتخابات آئین اور قانون کے تحت منصفانہ اور شفاف کروانے کو یقینی بنائے گا۔
الیکشن کیلئے جمعرات کے دن پر اتفاق، سرکاری چھٹیہوگی؟
عمران خان مقبول لیڈر ہیں، بیلٹ پیپر پر بلے کا نشان ہوگا، چیف الیکشنکمشنر
