جوڈیشل کمیشن آف پاکستان نے سندھ ہائیکورٹ کے قاٸم مقام چیف جسٹس عرفان سعادت کی بطور سپریم کورٹ جج تعیناتی کی سفارش کردی جبکہ جوڈیشل کمیشن نے جسٹس عرفان سعادت کا نام حتمی منظوری کے لیے پارلیمانی کمیٹی برائے ججز تقرری کو بھجوا دیا۔
چیف جسٹس آف پاکستان قاضی فائز عیسیٰ کی سربراہی میں جوڈیشل کمیشن کا اجلاس ہوا، جس میں سپریم کورٹ میں 2 ججز کی اسامی میں سے ایک سیٹ پر جسٹس عرفان سعادت کی سفارش کی گئی۔
سپریم کورٹ کی جانب سے جاری کردہ اعلامیہ میں کہا گیا ہے کہ جوڈیشل کمیشن اجلاس میں جسٹس عرفان سعادت خان کی بطور جج سپریم تعیناتی کی اتفاق رائے کی سفارش کی گئی، وزیر قانون نے بیرون ملک میں ہونے کے سبب اپنی رائے تحریری صورت میں دی۔
اعلامیے کے مطابق چیف جسٹس پاکستان نے کہا کہ جسٹس عرفان سعادت خان تجربہ کار اور اچھی شہرت رکھنے والے جج ہیں، جسٹس عرفان سعادت خان ہائیکورٹ کے تمام چیف جسٹس صاحبان اور ججز میں سے سینئر ہیں۔
جوڈیشل کمیشن اجلاس میں ہائیکورٹ کے ججز کی تعیناتی کے طریقے پر تجاوز پیش کی گئیں، ہائیکورٹ کے ججز کی تعیناتی کے طریقہ کار کی تجاوز تمام ممبران کو فراہم کر دی گئی ہیں۔
ممبران سے کہا گیا ہے کہ طریقہ کار پر دی گئی تجاویز پر 27 اکتوبر تک رائے دیں جس کے بعد جوڈیشل کمیشن کے آئندہ اجلاس میں تجاویز پر غور کیا جائے گا۔
جسٹس عرفان سعادت نے قائم قام چیف جسٹس سندھ ہائیکورٹ کا حلف اٹھالیا
واضح رہے کہ جسٹس عرفان سعادت اس وقت سندھ ہائیکورٹ کے قائم مقام چیف جسٹس کی حیثیت سے خدمات انجام دے رہے ہیں۔
