پاک فوج اور نیشنل ڈیزاسٹر مینجمنٹ اتھارٹی نے فوری طور پر غزہ کیلئے امداد کی پہلی کھیپ اسلام آباد سے براستہ مصر روانہ کیا۔ نگراں وزیرخارجہ جلیل عباس جیلانی نے کہا ہے کہ فلسطینیوں کے مصائب کے خاتمے کیلئے دنیا کو اکٹھا ہونا چاہئے۔
مظلوم فلسطینی بہن بھائیوں کی امداد میں موسم سرما کیلئے ایک ہزار خیمے، چار ہزار کمبل اور تین ٹن ادویات شامل ہیں۔
آئی ایس پی آر کے مطابق پاکستان کی جانب سے روانہ کی گئی کھیپ کے باعث متاثرین غزہ کو فوری ریلیف ملے گا۔
پاک فوج کی جانب سے جاری بیان میں کہا گیا ہے کہ پاکستان مشکل کی اس گھڑی میں فلسطینی بہن بھائیوں کے ساتھ کھڑا ہے اور ان کی حمایت جاری رکھے گا۔
پاکستان سے روانہ کیا گیا امدادی سامان مصر پہنچ گیا۔ خصوصی چارٹرڈ طیارہ مصر کے العریش ایئرپورٹ پہنچا۔ مصر سے امدادی سامان رفاہ سرحد کے ذریعے غزہ بھیجا جائے گا۔
نگراں وزیرخارجہ جلیل عباس جیلانی نے ٹوئٹر پیغام میں کہا ہے کہ فلسطینیوں کے مصائب کے خاتمے کیلئے دنیا کو اکٹھا ہونا چاہئے۔
انھوں نے کہا کہ غزہ کے فلسطینی بہن بھائیوں کی مدد کا موقع ملا ہے، ہم نے مصر کے راستے غزہ کیلئے امدادی سامان روانہ کردیا ہے۔
ان کا کہنا تھا کہ 100 ٹن امدادی سامان فلسطین کے عوام کیلئے بھیجا ہے، امداد سامان میں ٹینٹ، کمبل اور ادویات شامل ہیں۔
